TLAPOUALISTLI 72

ToTajtsin Dios okipaleui ueyi tekiua Ezequías

¿TIKMATI tleka nin tlakatl motlatlaujtijtok ixpan Jehová? ¿Tleka kitlalijtok ninmej amatlajkuilolmej ixpan ialtar Jehová? Nin tlakatl itoka Ezequías. Ye kajki ken ueyi tekiua itech tekiuajkayotl itech ome nechikolmej itech altepetl Israel. Uan kipia miak ouijkayotl. ¿Tleka?

Pampa soldados asirios okixpolojkej majtlaktli nechikolmej tlen okatkaj ik norte. Jehová okika ijkon ma pano pampa amo okatkaj yolkualmej. Uan axan soldados asirios okinekiayaj kixpoloskej ome nechikolmej.

Ueyi tekiua itech Asiria okititlanili ueyi tekiua Ezequías ninmej amatlajkuilolmej. Ninmej amatlajkuilolmej tlen ueyi tekiua Ezequías okintlali ixpan toTajtsin Dios. Amatlajkuilolmej okipijpinatiayaj Jehová, uan okilui Ezequías ma kikaua ma kitlanilikan. Ik non, Ezequías omotlatlaujti: ‘Oh Jehová, xitechmakixti itech ueyi tekiua itech Asiria. Ijkuakon, nochtin altepemej kimatiskej san te toTajtsin Dios’. ¿Kikakiliskia Jehová?

Ezequías okatka se ueyi tekiua yolkuali. Amo okatka ken oksekimej ueyi tekiuajkej amo yolkualmej tlen otlanauatiayaj itech majtlaktli nechikolmej itech Israel, nion okatka ken itajtsin amo yolkuali ueyi tekiua Acaz. Ye okitlakamatiaya nochtin itlanauatiluan Jehová. Ik non, ijkuak otlanki omotlatlaujti, teotlajtojki Isaías okititlanili se tlajtoli tlen okilui Jehová: ‘Ueyi tekiua itech Asiria amo kalakis itech Jerusalén. Nion se itech isoldados kalakis itech Jerusalén. Amo kikajkauaskej nion se flecha itech altepetl’.

Xikita tlaixkopinal tlen moita itech nin página. ¿Tikmati akinmej ninmej soldados tlen yomikej? Yejuan soldados asirios. Jehová okititlanki iángel, uan san itech se yoak ángel okinmikti 185,000 soldados asirios. Ik non, ueyi tekiua itech Asiria ocholo.

Tekiuajkayotl itech ome nechikolmej omomakixti, uan nochi altepetl okipixki yolseuilistli seki kauitl. Maski ijkon, satepan omikik Ezequías, ikone Manasés okitlalijkej ken ueyi tekiua. Nin tlakatl Manasés uan satepan ikone Amón okatkaj ueyi tekiuajkej amo yolkualmej. Ik non, itech nochi altepetl okatkaj miak tlamantli tlen amo kuali. Ijkuak itekipanojkauan ueyi tekiua Amón okimiktijkej, ijkuakon, ikone Josías okitlalijkej ken ueyi tekiua itech tekiuajkayotl itech ome nechikolmej.

2 Reyes 18:1-36; 19:1-37; 21:1-25.