ILOA nakai e koe ko e ha e tagata taane nei ne liogi ki a Iehova? Ko e ha ne fofola e ia e tau tohi nei i mua he fatapoa ha Iehova? Ko e tagata nei ko Hesekia. Ko ia ko e patuiki he faahi toga he kautu he magafaoa tokoua ha Isaraela. Ti kua tupetupe lahi a ia. Ko e ha?

Ha kua fitā e moumou he tau kautau Asuria e tau magafaoa 10 he faahi tokelau. Ne fakaatā e Iehova e mena nei ke tupu ha kua mahani kelea lahi e tau tagata ia. Ti ko e mogonei kua o mai e tau kautau Asuria ke latau ke he kautu he magafaoa tokoua.

Ko e fakafano atu laia he patuiki ha Asuria e tau tohi ke he Patuiki ko Hesekia. Ko e tau tohi ia anei ne tuku e Hesekia ki mua he Atua. Ne fakafiufiu e tau tohi ki a Iehova, mo e tala age ki a Hesekia ke tiaki ua totoko. Ti ko e kakano hanei ati liogi ai a Hesekia: ‘Iehova na e, fakamomoui a mautolu mai he patuiki ha Asuria. Ti iloa ai he tau motu oti ko e Atua a koe hoko koe ni.’ To fanogonogo nakai a Iehova ki a Hesekia?

Ko Hesekia ko e patuiki mitaki. Nakai tatai a ia mo e tau patuiki kelea he magafaoa 10 he kautu ha Isaraela, po ke tuga e matua taane mahani kelea haana ko e Patuiki ko Ahasa. Ne fakaeneene lahi a Hesekia ke omaoma oti ke he tau fakatufono ha Iehova. Ti magaaho ne oti e liogi ha Hesekia, ne fakafano atu he perofeta ko Isaia ki a ia e fekau nei mai ia Iehova. ‘To nakai hau e patuiki ha Asuria ki Ierusalema. Nakai taha he tau kautau haana ke teitei tata atu ki ai. To nakai fana mai ha fana ke he maaga.’

Onoono la ke he fakatino he lau tohi nei. Iloa nakai e koe ko hai e tau kautau nei kua mamate? Ko lautolu ko e tau Asuria. Ne fakafano atu e Iehova e agelu haana, ke he taha ni e pō ne kelipopo he agelu 185,000 e kautau Asuria. Ti tiaki ai he patuiki ha Asuria mo e liu ki kaina.

Kua hao e kautu he tau magafaoa tokoua, ti fai magaaho ne mafola ai e tau tagata. Ka e he mole e mate ha Hesekia ne tu hake e tama taane haana ko Manase ke patuiki. Ko Manase mo e haana tama taane ko Amone ne tatao hake ia ia ko e tau patuiki mahani kelea lahi. Ti liu foki e motu puke he mahani kelea mo e favale. Magaaho ne kelipopo he tau fekafekau ni haana e Patuiki ko Amone, ne eke e tama taane haana ko Iosia mo patuiki he kautu he tau magafaoa tokoua.