ASOO ɛze deɛ mɔɔ ɔti nrenya ne ɛlɛsɛlɛ Gyihova la ɔ? Duzu ati a yeva ngɛlata ɛhye mɔ yegua Gyihova afɔlemokyea ne anyunlu ɛ? Bɛfɛlɛ nrenya ne Hɛzikaya. Ɔle Yizilayɛ nyiakɛ mbusua nwiɔ ne azo belemgbunli. Na yeyia ngyegyelɛ dɔɔnwo. Duzu ati ɔ?

Ɔluakɛ Aseleama ɛlɔne ɛlumua ɛzɛkye sɔlɔ mbusua 10 ne. Gyihova manle ɛhye anwo adenle ɔluakɛ ɛnee menli zɔhane ɛyɛ ɛtane somaa. Na kɛkala Aseleama ɛlɔne ne ɛra kɛ bɛ nee mbusua nwiɔ belemgbunlililɛ ne baho.

Aseleama belemgbunli ne ɛva ngɛlata ɛrɛlɛ Belemgbunli Hɛzikaya. Ngɛlata ɛhye a Hɛzikaya ɛdɛlɛ nu ɛgua Nyamenle anyunlu ɛke la. Ngɛlata ne si Gyihova amgbu, na ɔka ɔkile Hɛzikaya kɛ ɔlie ɔdo nu kɛ ɔnrɛhola bɛ. Ɛhye ati a Hɛzikaya yɛle asɔne kɛ: ‘O Gyihova, die yɛ fi Aselea belemgbunli ne asa nu. Amaa maanle maanle kɔsɔɔti anwu kɛ ɛdawɔ ala a ɛle Nyamenle a.’ Asoo Gyihova badie Hɛzikaya ɔ?

Hɛzikaya le belemgbunli kpalɛ. Ɔnle kɛ Yizilayɛ mbusua 10 belemgbunlililɛ ne azo arelemgbunli ɛtane ne mɔ, anzɛɛ Ehaze, ɔ ze ɛtanevolɛ ne la. Hɛzikaya ɛbɔ mɔdenle ɛli Gyihova mɛla ne mɔ azo. Ɔti Hɛzikaya wiele asɔne ne yɛ la, ngapezonli Ayezaya vale edwɛkɛ ɛhye mɔɔ vi Gyihova ɛkɛ ne la hɔmanle ye kɛ: ‘Aselea belemgbunli ne ɛnrɛra Gyɛlusalɛm. Ye ɛlɔnema ne mɔ anu ko bɔbɔ ɛnrɛbikye ye. Bɛnrɛdo ɛda ko bɔbɔ wɔ suakpole ye azo.’

Nea nvoninli ne mɔɔ wɔ mukelɛ ɛhye anu la. Ɛze ɛlɔnema mɔɔ bɛwu bɛgua ɛke la ɔ? Aseleama ɛne. Gyihova zoanle ye anwumabɔvolɛ ko na kenle ko nɔɔzo ɔhunle Aselea ɛlɔnema 185,000. Ɔti Aselea belemgbunli ne angola gyinla na ɔziale ɔhɔle ye sua zo.

Bɛliele mbusua nwiɔ belemgbunlililɛ ne, na menli ne dɛnlanle anzondwolɛ nu wɔ mekɛ ekyi anu. Noko mekɛ mɔɔ Hɛzikaya wule la ɔ ra Manasɛ rayɛle belemgbunli. Manasɛ nee ɔ ra Emɔn mɔɔ rale amozii la biala anyɛ belemgbunli kpalɛ. Yemɔti basabasayɛlɛ nee ɛtanelilɛ yile azɛlɛ ne azo bieko. Mekɛ mɔɔ Belemgbunli Emɔn azonvolɛ ne mɔ hunle ye la, bɛziele ɔ ra Dwosaya belemgbunli wɔ mbusua nwiɔ belemgbunlililɛ ne azo.