¿LA AWETAʼM suche tijan kubʼan uchʼawem wajun achi riʼ che Jehová? ¿Suche uyaʼom ri täq wuj chuwäch ri Uʼaltar? Wajun achi riʼ ubʼiʼ Ezequías. Ezequías are ajawinel che ri kebʼ tribus rech Israel. Tekʼuriʼ kʼo pa jun nim kʼäx. ¿Suche kabʼij at?

Ri täq ajchʼoj asirios kichʼakom chik ri täq 10 tribus. Jehová xuya chike che xkichʼako rumal che wa täq winaq riʼ xa e itzel. kimik ri täq ajchʼoj asirios xepe chikij ri winaq rech ri kebʼ tribus.

Ri ajawinel rech Asiria xutaq bʼi täq wuj che ri ajawinel Ezequías. Wa täq wuj riʼ e areʼ uyaʼom Ezequías chuwäch ri Ajawaxel. Chupam ri wuj riʼ ketzeʼn chirij Jehová, xuqujeʼ xkebʼij che Ezequías kuya ribʼ che kchʼakik. Rumal laʼ Ezequías xubʼan jun uchʼawem: ‹Oh Jehová, chujato puqʼabʼ ri ajawinel rech Asiria. Tekʼuriʼ konojel ri täq tinamit kketaʼmaj che xaq xiw at, at qastzij Ajawaxel›. ¿La xuta Jehová wajun chʼabʼal riʼ?

Ezequías are jun utz ajawinel. Junam täj kukʼ ri itzel täq ajawinel rech ri 10 tribus rech Israel, xuqujeʼ junam täj rukʼ ri itzelalaj utat ubʼiʼ Acaz. Ri Ezequías ubʼanom ronojel ri täq utaqonik ri Jehová. Rumal laʼ, chiʼ xukʼis ubʼanik ri uchʼawem, ri ajqʼaxal utzij Jehová ubʼiʼ Isaías xuqʼaxaj ubʼixik ri xubʼij lo ri Jehová che, xubʼij: ‹Ri ajawinel rech Asiria kok täj pa Jerusalén. Ri täq urajchʼoj kʼot nijun kok pa Jerusalén. Xuqujeʼ kekʼaq ta jun cheʼ (flecha) chirij ri tinamit›.

Chawilaʼ ri wachbʼäl. ¿La awetaʼm jachin täq ri ajchʼoj e kamnäq chiriʼ? Are ri täq asirios. Jehová xutaq loq jun uʼangel, pa jun chaqʼabʼ wajun ángel riʼ xeʼukamsaj 185.000 ajchʼoj rech Asiria. Rumal waʼ, ri ajawinel rech Asiria xbʼek.

Ri kebʼ tribus xechʼak täj, rumal laʼ ri tinamit kʼo uxlunem che kixol pa kebʼ oxibʼ junabʼ. Tekʼuriʼ chiʼ kamnäq chik ri Ezequías, Manasés ri ukʼojol Ezequías are xubʼan ajawinel. Wa achi riʼ Manasés tekʼuriʼ ri ukʼojol ubʼiʼ Amón xkebʼan itzel täq ajawinel. Rumal laʼ ri ulew xnoj che itzelal xuqujeʼ che chʼoj. Chiʼ ri täq umos xkekamsaj ri Amón, Ri ukʼojol ubʼiʼ Josías xubʼan ajawinel rech kebʼ tribus.