¿KATSIYA wix tuku xlakata uma chixku tlawanima oración Jehová? ¿Tuku xlakata wilinit uma tatsokgni kxlakatin niku tlawanikan tamakamastan Jehová? Uma chixku xtukuwani Ezequías. Wa mapakgsina kxapulaktiy laklanka familia li Israel. Chu uku kgalhiy lanka taʼakglhuwit. ¿Tuku xlakata?

Xlakata soldados li Asiria malakgsputukgolha pulakkaw laklanka familia xalak pakxtu. Jehová mastalh talakaskin pi chuna kaʼakgspulakgolh xlakata tama kristianos lu lixkajni xlikatsikgoy. Chu uku soldados li Asiria minkgonit xlakata nakamasputuy pulaktiy laklanka familia li Israel.

Mapakgsina xalak Asiria makaminilh tatsokgni Ezequías. Wa uma tatsokgni nema wilinit xlakatin niku tlawanikan tamakamastan Jehová. Anta uma ktatsokgni lixkajni lichuwinan Jehová, chu anta waniy Ezequías katamakamastakgolh. Wa xlakata Ezequías waniy Dios: Wix kintlat Jehová, kakilamakgtayaw chu nitu kakinkatlawanin mapakgsina xalak Asiria. Chuna putum laklanka kachikin nakatsikgoy pi wix miakstu Dios chu nitiku achatum. ¿Nakgaxmatni Jehová xʼoración?

Ezequías xatlan mapakgsina. Ni la tiku xalak lixkajni mapakgsinanin xapulakkaw laklanka familia xalak Israel chu ni chuna la xtlat Acaz. Xla kgalhakgaxmata chuna la wi xlimapakgsin Jehová. Wa xlakata akxni Ezequías tlawakgolh xʼoración, Jehová malakgachalh xpalakachuwina Isaías xlakata nawaniy: Xmapakgsina li Asiria ni katitanulh kJerusalén. Ni chastum ksoldado natalakatsuwiy. Nipara kgantum flecha katimakaminkgolh kkachikin.

Kaʼakxilhti uma dibujo. ¿Katsiya tiku umakgolh soldados nema nikgonitta? Wa li Asirios. Jehová malakgachalh xʼángel chu kamakgnilh 185,000 soldados li Asiria. Wa xlakata mapakgsina li Asiria taspitpa.

Pulaktiy laklanka familia xapakgalhu lakgtaxtukgolh chu kachikin tlan tawilaparakgolh pero ni makgas. Akxni ay xninitta Ezequías, tsukulh mapakgsinan xkgawasa wanikan Manasés. Mapakgsinanin, Manasés chu xkgawasa Amón lu laklixkajni likatsikgoy. Wa xlakata kachikin litatsamalh tiku nitlan likatsiy chu tiku lakatsalay limapakgsin. Akxni kskujnin Amón makgnikgolh, xkgawasa Josías wa tsukulh mapakgsinan anta kpulaktiy laklanka familia nema xalak pakgalhu.