NOMANYA habwaki omusaija onu nasaba Yahwe? Habwaki ayanjurwize ebbaruha zinu zoona mumaiso g’ekyoto kya Yahwe? Omusaija onu nuwe Hezekiya. Nuwe mukama w’enganda ibiri eza Isareri ey’omu masirimuka. Kandi ali mu kabi kaingi. Nomanya habwaki?

Habwokuba amahe ga Asura gaali gamazire kuhwerekereza obukama bw’omu matemba obw’enganda ikumi. Yahwe akaleka kinu okubaho habwokuba abantu baali babi muno. Hati amahe ga Asura gaali gaizire kuramagira obukama obw’enganda ibiri.

Omukama wa Asura akaba amazire kuhandikira omukama Hezekiya ebbaruha. Zinu nizo ebbaruha Hezekiya akaba ataire mu maiso ga Ruhanga. Ebbaruha zali nizidurra Yahwe n’okuragira Hezekiya kuhanika emikono. Enu niyo nsonga habwaki Hezekiya yasabire ati: ‘Ai Yahwe, tujune kuruga mumikono gy’omukama wa Asura. Obu nubwo amahanga goona galimanya ngu niwe wenka oli Ruhanga.’ Yahwe akaba naija kuhuliriza okusaba kwa Hezekiya?

Hezekiya mukama murungi. Tarukusisana n’abakama abandi ababi ab’obukama bw’enganda 10 eza Isareri rundi kusisana ise Ahazi ayabaire mukama mubi muno. Hezekiya atwire naakuratira ebiragiro bya Yahwe byona. Nahabwekyo, hanyuma ya Hezekiya kusaba, omurangi Isaya akamusindikira obutumwa bunu kuruga hali Yahwe: ‘Omukama wa Asura talitaaha omu Yerusalemu. Busaho n’omu h’abasirikale be alirusembera haihi. Tibalirasayo engobe n’emu omurubuga.’

Dora omukisisani ha rupapura runu. Nomanya emirambo egi yoona yabaha? Y’Abasura. Yahwe akatuma maraika we mukiro kimu. Maraika onu akaita abasirikale b’Abasura 185,000. Nahabwekyo omukama w’Asura ebyokurwana akabirugaho n’okugarukayo owabu.

Obukama bw’enganda ibiri bukakizibwa, kandi abantu batunga obusinge kumara akasumi kake. Baitu hanyuma y’okufa kwa Hezekiya, mutabani we Manase nuwe yafoirwe omukama. Manase, na mutabani we Amoni ayamugarukireho, bombi bakaba bakama babi muno. Nahabwekyo, nsi ekagaruka kubamu obucwi bw’ebiragiro n’obutatekaana. Hanyuma y’omukama Amoni kwitwa abahereza be, mutabani we Yosiya akatandika kulema nk’omukama ow’enganda ibiri.