ЧҮГЕ бо кижи Иеговага мөргүп тур, билир сен бе? Чүү дээш ол Иегованың өргүл салыр бедигээжиниң мурнунга бо чагааларны чада салыпканыл? Ол Езеки́я-дыр. Изра́ильдиң ийи төрел аймактың мурнуу күрүнениң хааны-дыр. Ол улуг айыылда. Чүге?

Чүге дээрге Асси́рияның шерии соңгу күрүнениң 10 төрел аймаан шагда-ла узуткап каапкан. Иегова ону чөпшээрээн, чүге дээрге ол черниң чурттакчылары дыка багай турган. Ынчангаш ам ассири́й шериг ийи төрел аймактыг күрүне-биле тулчур дээш чедип келген.

Езеки́я хаан ассири́й хаандан чагааларны ам чаа алган. Оларны-ла ам Езеки́я Бурганның мурнунга чада салып алган. Чагааларда Иегованы кочулаан, ол ышкаш Езеки́яны дүжүп берзин деп сүмелээн. Ынчангаш Езеки́я мөргүп турар: ‘Иегова, бисти Асси́рияның хаанындан камагалап көр. Ынчан шупту чоннар чүгле сен — Бурган сен деп билип алыр’. Иегова Езеки́яны дыңнап кааптар ирги бе?

Езеки́я — эки хаан. Ол Изра́ильдиң ийи төрел аймактыг күрүнениң каржы хааннарындан база бодунуң адазы — каржы Ахаз хаандан ылгалып турар. Езеки́я Иегованың шупту хоойлуларын дыңнаарын кызып турган. Ынчангаш, кажан ол мөргүлдү төндүрүптерге, Иса́ия медээчи аңаа Иеговадан дараазында медээни дамчыткан: ‘Ассири́й хаан Иерусали́мче кирбес. Чаңгыс-даа ооң шерии хоорайга чоокшулавас. Чаңгыс-даа согун Иерусали́мче атпас’.

Бо арында чурукче көрүвүт. Бо өлүг шериглер кымнарыл, билир сен бе? Ол дээрге ассири́йжилер-дир. Иегова бодунуң төлээзин чоргузуптарга, чаңгыс дүн иштинде дээрниң төлээзи 185 000 ассири́й шериглерни өлүрүп каапкан. Ынчангаш-ла ассири́й хаан дүжүп бергеш, чана берген.

Ийи төрел аймактыг күрүне камгалаттына берген, ынчангаш кезек үеде чон тайбың чурттап турар. Ынчалза-даа Езеки́я хаанның өлүмүнүң соонда ооң Мана́ссия деп оглу хаан болу берген. Мана́ссия болгаш ооң соонда хааннай берген ооң оглу Аммо́н, кайызы-даа багай хааннар турган. Ынчангаш чурт катап күчүлел болгаш каржы-дошкун-биле дола берген. Аммо́н хаанны чалчалары өлүрүп каапкан, ынчангаш ийи төрел аймактыг күрүнениң хааны ооң оглу Ио́сия апарган.