¿YABAL anaʼ bin yuʼun te yak ta skʼoponel Jehová te winik ini? ¿Bin yuʼun te yakʼoj ta stojol skajtijib chikʼbil majtʼanil te cartaetik ini? Te winik ini jaʼ te Ezequiase. Jaʼ ay ta ajwalil yuʼun te chaʼchajp stsʼumbal Israel te ayik ta sur. Ay ta tulan wokol. ¿Bin yuʼun?

Jaʼ ta swenta te bitʼil te soldadoetik yuʼun Asiria slajinojikix-a te lajunchajp stsʼumbal Israel te ayik ta norte. Te Jehová la yakʼtiklan ta lajinel ta swenta te bitʼil kʼax chopolik te ants winiketik tey-ae. Jich te soldadoetik yuʼun Asiria tal slajinik te banti wentaimbil te chaʼchajp stsʼumbal Israel.

Te ajwalil yuʼun Asiria la stikumbey bael cartaetik te ajwalil Ezequías. Te cartaetik ini jaʼik te yakʼoj ta stojol Dios te ajwalil Ezequiase. Ta cartaetik ini ya yichʼ bol kʼoptayel tey-a te Jehová sok te akʼa yakʼ sba ta kʼabal te ajwalil Ezequiase. Jaʼ yuʼun la skʼopon Dios te ajwalil Ezequías: Jehová koltayawonkotik ta stojol te ajwalil Asiriae. Jichme ya snaʼik stojol spisil te nacionetik te jaʼatnax Diosat atukele. ¿Labal yaʼiy stojol te Jehovae?

Lekil ajwalil stukel te Ezequiase. Ma jichuk te bitʼil ajwaliletik yuʼun te lajunchajp stsʼumbal Israel, sok ma la spajbey stalel te stat te jaʼ te ajwalil Acaz te kʼax chopol stukele. Spisil schʼuunoj te mantaliletik yuʼun Jehová te Ezequías. Jaʼ yuʼun te kʼalal laj yoʼtan ta skʼoponel Dios te Ezequiase, jich la yichʼ albeyel yuʼun Jehová ta swenta te j-alwanej Isaías: Te ajwalil yuʼun Asiria maba ya x-och ta Jerusalén. Sok maʼyuk jtuluk soldadoetik te ya xnoptsaj talele. Soknix maba ya yichʼ tʼimalteʼtayel tal te lume.

Ilawil te lokʼomba te ay ta página ini. ¿Yabal anaʼ machʼatik-a te soldadoetik te lajemikixe? Jaʼ te asiriaetike. Te Jehová la stikun jtul chʼul abat yuʼun, jich ta junax ajkʼabal la smil 185,000 ta jtul soldadoetik yuʼun Asiria. Jich bajtʼ te ajwalil yuʼun Asiriae.

Jich kol te banti wentaimbil te chaʼchajp stsʼumbal Israel jich ayin lamal kʼinal ta stojol te lume. Te kʼalal lajemix-a te Ezequiase, jaʼ och jilel ta ajwalil te Manasés te snichʼane. Jaʼukmeto te Manasés kʼax chopol ajwalil la yakʼ sba, jaʼnix jich ta patil te kʼalal och ta ajwalil te Amón te snichʼane, melel noj ta mulil sok ta utsʼinwanej te lume. Te kʼalal la yichʼ milel te Amón ta swenta te j-abatetik yuʼune, te Josías te snichʼane jaʼ och jilel ta ajwalil ta swenta te chaʼchajp stsʼumbal Israel.