OVE hẽ wa kũlĩha esunga lieci ulume u a kasilili ndeti oku likutilila ku Yehova? Momo lie a kupuila ovikanda evi kovaso yutala wa Yehova? Ulume waco onduko yaye, Hesekiya. Hesekiya wa kala osoma yokombuelo yapata avali a va Isareli. Cilo o kasi lovitangi. Momo lie?

Momo va Asuria va lipongiya oku kundula apata ekũi vana vatiamẽlele kuviali wo konano. Yehova wa ecelela okuti va Asuria va kundula apata aco momo va kala olondingaĩvi. Cilo olohoka via va Asuria vieya oku liyaka lusoma wapata avali.

Soma ya va Asuria wa tuma ovikanda ku Soma Hesekiya. Ovikanda viaco ovio Hesekiya a kasi loku kapa ndeti kutala wa Suku. Vovikanda viaco va sonehamo olondaka vioku tomba Yehova kuenda oku sapuila Hesekiya oco a tile. Kuenje, Hesekiya wa likutilila hati: ‘A Yehova, tu popele peka lia soma ya va Asuria. Oco olofeka viosi vi limbuke okuti ove lika Suku yocili.’ Anga hẽ Yehova wa yevelela muẽle kohutililo ya Hesekiya?

Hesekiya wa kala osoma yimue yiwa. Eye wa litepele calua lolosoma viapata ekũi lia va Isareli. Kuenda ka kuamele ongangu ya isiaye Ahasi. Hesekiya wa enda loku pokola kovihandeleko via Yehova. Eci Hesekiya amãla oku likutilila, uprofeto Isaya wo tumisa esapulo lia Yehova hati: ‘Soma ya va Asuria ka iñila vo Yerusalãi. Olohoka viaye ka viamẽla ocipepi limbo, ndaño oku imbamo usongo.’

Kũlĩhisa ociluvialuvia eci kemẽla lilo. Ove hẽ wa kũlĩha asualãli va fa ndeti? Asualãli vaco va Asuria. Yehova wa tuma ungelo waye kuenje vuteke umosi wa ponda eci ci soka ocita lakũi ecelala kolohũlũkãi kolohũlũkãi vitãlo kasualãli va Asuria. Soma ya va Asuria wa tila kuenje wa tiukila vimbo.

Uviali wapata avali, wa popeliwa kuenje omanu va kala lombe-mbua vokuenda kuotembo yimue. Noke yoku fa kua Hesekiya, omõlaye Manase wa piñala komangu yaye. Manase lomõlaye Amoni, va kala olondingaĩvi kotembo yuviali wavo. Vokuenda kuotembo, vofeka mueya oku yuka ungangala levĩho lialua. Eci Soma Amoni a pondiwa lakuenje vaye, omõlaye Yosiya wa fetika oku viala apata avali.

2 Olosoma 18:1-36; 19:1-37; 21:1-25.