Ni a ḓivha uri ndi ngani uyu munna a tshi khou rabela Yehova? Uri ndi ngani o vhea aya marifhi phanda ha aletare ya Yehova? Munna ndi Hiskia. Ndi khosi ya tshaka mbili dza tshipembe dza Isiraele. U khomboni khulu. Ndi ngani?

Ngauri mmbi dza Asuri dzo vha dzo no fhelisa tshaka dza 10 dza devhula. Yehova o litsha izwi zwa itea ngauri avho vhathu vho vha vhe vhavhi. Zwenezwo mmbi dza Asuri dzo vha dzo ḓa u lwisa muvhuso wa tshaka mbili.

Khosi ya Asuri yo vha i kha ḓi bva u rumela marifhi kha Khosi Hiskia. Ndi marifhi a Hiskia e a vhea afha phanḓa ha Yehova. Marifhi o vha a tshi sema Yehova, na u vhudza Hiskia uri a ḓinekedze. Ndi nga hone Hiskia o rabela: ‘Yowee Yehova, ri tshidze kha khosi ya Asuri. Ndi hone tshaka dzoṱhe dzi tshi ḓo ḓivha uri iwe u Mudzimu u woṱhe.’ Naa Yehova o vha a tshi ḓo pfa Hiskia?

Hiskia o vha e khosi yavhuḓi. O vha a sa ngi khosi mmbi dza muvhuso wa tshaka dza 10 dza Isiraele, kana sa khotsi awe muvhi Khosi Ahasi. Hiskia o vha a tshi thetshelesa milayo yoṱhe ya Yehova. Ngauralo, Hiskia o no fhedza u rabela, muporofita Yesaya a mu rumela iyi ndaela i bvaho ha Yehova: ‘Khosi ya Asuri a i nga dzheni Yerusalema. Maswole awe ha nga vhuyi a sendela. A vha nga posi na musevhe na muthihi muḓini.’

Sedzani tshifanyiso kha iḽi siaṱari. Ni a ḓivha uri aya maswole o faho ndi vhonnyi? Ndi Vhaasuri. Yehova o vha o ruma muruṅwa wawe, u vhulaha maswole a Vhaasuri a 185 000 nga vhusiku vhuthihi. Ngauralo khosi ya Asuri ya ṅala ya vhuelela hayani.

Muvhuso wa tshaka mbili wo vha wo tshidzwa, nahone vhathu vha vha na mulalo tshifhinganyana. Fhedzi Hiskia o no fa murwa wawe Manase a vha khosi. Manase na murwa wawe Amoni nga murahu hawe vho vha vhe dzikhosi mmbi. Shango ḽa dovha ḽa ḓala nga vhupfukamulayo na vhuvemu. Musi Khosi Amoni o vhulawa nga vhaḓinḓa vhawe, murwa wawe Yosia a itwa khosi ya muvhuso wa tshaka mbili.

2 Dzikhosi 18:1-36; 19:1-37; 21:1-25.