MAARAM ka ba kon kay ano nga nag-aampo ini nga lalaki kan Jehova? Kay ano nga iya iginlatag ini nga mga surat ha atubangan han altar ni Jehova? Ini nga lalaki amo hi Hesekia. Hiya an hadi han duha nga tribo han Israel ha sur. Ngan daku an iya problema. Kay ano?

Tungod kay ginbungkag na han kasundalohan han Asirya an 10 nga tribo ha norte. Gintugotan ni Jehova nga mahitabo ito tungod kay magraot gud an mga tawo didto. Ngan yana, maatake an kasundalohan han Asirya ha duha-ka-tribo nga ginhadian.

Nagpadara pa la hin mga surat kan Hadi Hesekia an hadi han Asirya. Ini an mga surat nga iginlatag dinhi ni Hesekia ha atubangan han altar han Dios. An mensahe hito nagtatamay kan Jehova, ngan nag-aaghat kan Hesekia nga sumurender. Salit nag-ampo hi Hesekia: ‘O Jehova, talwasa kami tikang ha hadi han Asirya. Basi an ngatanan nga nasud mahibaro nga ikaw la an Dios.’ Pamamatian ba ni Jehova hi Hesekia?

Maopay nga hadi hi Hesekia. Diri hiya pariho han magraot nga hadi ha 10-ka-tribo nga ginhadian han Israel, o han iya maraot nga tatay nga hi Hadi Ahas. Ginsugot gud ni Hesekia an ngatanan nga balaud ni Jehova. Salit, katapos niya mag-ampo, nagpadara hi propeta Isaias hin mensahe tikang kan Jehova: ‘An hadi han Asirya diri makakaatake ha Jerusalem. Diri ngani makakahirani an bisan usa han iya kasundalohan. Diri hira makakapana bisan makausa ngada ha syudad.’

Kitaa an retrato dinhi. Maaram ka ba kon hin-o ini nga mga patay nga kasundalohan? Hira an mga Asiryahanon. Ginsugo ni Jehova an iya anghel, ngan ha usa la ka gab-i ginpatay hito an 185,000 nga kasundalohan han Asirya. Salit inatras an hadi han Asirya ngan inuli.

Natalwas an duha-ka-tribo nga ginhadian, ngan nagkaada hin kamurayawan an katawohan. Kondi han namatay hi Hesekia, an iya anak nga hi Manases an nagin hadi. Hi Manases ngan an iya anak nga hi Amon magraot gud nga hadi. Salit napuno na liwat an nasud hin krimen ngan kamadarahog. Han ginpatay hi Hadi Amon han iya mga surugoon, an iya anak nga hi Josia an nagin hadi ha duha-ka-tribo nga ginhadian.