ANA akumanyilila ligongo lyakwe munduju akupopela kwa Yehofa? Ana ligongo cici aŵisile yikalata pawujo pa masabawu gakutajila mbopesi? Munduju ali Hesekiya. Ali mwenye jwa ucimwene wakummwela wa mitundu jiŵili ja Ayisalayeli. Jwalakwe asimene ni yakusawusya yekulungwa. Ana ligongo cici?

Ligongo lyakuti asilikali ŵa Asuli ajonasile ucimwene wa kumpoto wa mitundu 10. Yehofa ŵakundile kuti yeleyi yitendekwe ligongo ŵanduwo ŵaliji ŵakusakala mnope. Sambano asilikali ŵa Asuli ayice kukumenyana ni ucimwene wa mitundu jiŵili.

Mwenye jwa Asuli agambile kutumisya kwene yikalata kwa mwenye Hesekiya. Yikalata yakwe ni yeleyi yele Hesekiya yayiŵisile pameso pa Mlungu. Yikalatayi yili yakunyosya Yehofa, soni akumsalila Hesekiya kuti alece kulamulila. Ni ligongo lyakwe Hesekiya akupopela acitiji: ‘O Yehofa atukulupusye kwa mwenye jwa Asuli. Pelepo mitundu josope jicimanyilila kuti ŵalakwe jika ali Mlungu.’ Ana Yehofa capikanile lipopelo lya Hesekiya?

Hesekiya ali mwenye jwambone. Nganaŵa mpela acayimwene ŵa mitundu 10 ja Ayisalayeli, nganaŵasoni mpela mwaŵaŵelele mwenye Ahasi babagwe. Hesekiya aŵele mkukuya cenene malamusi ga Yehofa. Sambano pamalisisye kupopela, jwakulocesya Yesaya akumsalila utenga ŵakutyocela kwa Yehofa wakuti: ‘Mwenye jwa Asuli ngasayika ku Yelusalemu. Atamose asilikali ŵakwe ngasaŵandicila msindawo. Ngasaponya atamose mpamba umo mumsindamo.’

Alole ciwililici. Ana akumanyilila kuti asilikali ŵawileŵa ali ŵani? Jemanjaji ali Asuli. Yehofa ŵatumisye lilayika lyakwe, ni cilo cimo lyawuleje Asilikali ŵa Asuli ŵakwana 185,000. Sambano mwenye jwa Asuli ŵawujile kumangwakwe ngaputa ngondo.

Ucimwene wa mitundu jiŵili ukukulupuka, ni ŵanduwo akuŵa mumtunjelele kwakandaŵi. Nambo paŵawile Hesekiya, Manase mwanagwe, akuŵa mwenye. Manase, soni Amoni mwanagwe akuŵa acayimwene ŵakuyicisya ŵakusakala mnope. Cilamboco cikugumbalasoni ŵandu ŵangakuya malamusi, soni ŵakuwulasyana. Mwenye Amoni pawulajikwe ni ŵamasengo ŵakwe,Yosiya mwanagwe akuŵa mwenye jwa ucimwene wa mitundu jiŵili.