JOSIA niey pura tripantu müten ñi rey ngerpun, ti waywen-ngechi (sur-ngechi) epu trokiñ reñma Israel mu. Rume pichin (püchün) tripantu niey tañi rey ngerpual. Feymu lle, wüne mu kiñeke füchake che kellueyew ñi ngünenieal ti mapu.

Dew rupalu regle tripantu Josia ñi rey ngen, amuy ñi kintuafiel Jewba. Inaniefi ñi femken ta kümeke rey David, Jeosafat, ka Esekia reke. Petu ñi weche wentru ngen, femi kiñe llükakenochi dungu.

Fentren tripantu mu, epe kom Israel che rume wedake (weyake) che ngekefuyngün. Poyekefi koylake dio. Pochongnagkeyngün ñi poyeafiel ti adentun. Feymu Josia ka ñi pu wentru llituy (amuy) ñi nentuafiel koylake poyen ti mapu mu. Tüfa kiñe fütra küdaw ngey, fentren che am poyekefilu koylake dio. Faw peafuymi Josia ka ñi pu wentru trafokamekefi engün ti poyengekechi adentun.

Fey wüla, Josia elfalkünufi küla wentru ñi küme eltual Jewba ñi ngillatuwe ruka. Trawülngey plata ti pu che mu, ka elungey tüfachi pu wentru ñi kulliafiel pu küdawfe. Petu ñi küdawmeken ti ngillatuwe ruka mu, ti longko saserdote Ilkia pey kiñe doy falin dungu: ti lifru nielu ley dungu Jewba ñi werküfiel Moyse ñi wirintükual fütra kuyfi mu, ka ñamkülekefuy.

Yelngelu ti lifru ta Josia, ‘chillkatulelmuchi’ pi Josia. Allkütulu, Josia pey ti pu che ñi feyentunofiel (müngeltunofiel) Jewba ñi ley dungu. Rume weñangküy, feymu lle wichari (wichafi) ñi takün, chumngechi peafuymi faw. Josia feypi: ‘Jewba illkuley (lladküley) kom iñchiñ mu, taiñ pu chaw em feyentulayngün ti ley dungu wirintükulelu tüfachi lifru mu.’

Josia werküfi ti longko saserdote Ilkia ñi inaduamal ñi chumaetew Jewba engün. Ilkia pemefi ti pelon domo Ulda pingelu, ka ramtufi tüfa. Kidu elufi tüfachi werken dungu küpalu Jewba mu ñi yelelafiel ta Josia: ‘Jerusalen waria mu ka kom ti pu che kastigangeay, poyekefilu am koylake dio ka ti mapu aporpuy wedake dungu mu. Welu eymi Josia, kümelkakelu am, tüfachi kastigan dungu küpayay dew lalmi wüla.’