JOSIASAX kimsaqallqu maranikïskänwa kunapachatï aynachankir pä tribun apnaqiripat uttʼayapxän ukhaxa. Marka apnaqañapatakix wawäskänwa. Ukatwa, apnaqañ qalltkän ukhaxa jilïrinakax yanaptʼapxänxa.

Josiasax paqallq mara apnaqxäna ukhaw Jehová Diosan yanaptʼapa thaqhäna. Suma apnaqirinakatwa yatiqasïna, Davitjam Josafatjam Ezequiasjamaw sarnaqäna. Waynitükasinwa, jan axsartʼasa akham luräna.

Israelitanakax walja tiempow jan wali jaqinakjam sarnaqapxäna. Yaqha diosanakaruw yupaychapxäna. Lurat diosanakaruw altʼasipxäna. Ukhamasti taqi ukanakwa Josiasampi yanapirinakapampix tʼunjapxäna. Wali chʼamänaw uk lurañaxa kunattix walja jaqinakaw ukar yupaychapxäna. Kunjamsa Josiasampi yanapirinakapampix tʼunjasipki ukxa aka dibujonwa uñjasma.

Ukatxa, Josiasax 3 tatanakaruw Jehová Diosan utap askichapxañapatakix uttʼayäna. Markpachatwa qullqix apthapisïna ukat uka 3 tatanakaruw churasïna luräwinakat pagasiñapataki. Diosan utapa askichasipkän ukhaxa, Hilcías sat jilïr sacerdotewa Moisesan qillqata librop katjäna, Jehová Diosan kamachinakapanïnwa uka libroxa, nayrax ukax chhaqatänwa.

Josiasaru uka libro uñachtʼayapkäna ukhaxa, liytʼayänwa. Uk istʼasaxa, Josiasax sänwa janirakis markax ukarjam sarnaqkitixä sasa. Wal llakisïna, ukatwa isipsa chʼiyjasïna, akan uñxataski ukhama. Ukat akham sänwa: ‘Jehová Diosax jiwasanakatak coleratawa, kunattix awkinakasaxa janiw aka libron qillqatäki uka kamachinakarjam sarnaqapkataynati’ sasa.

Uka juchanakasatxa Jehová Diosax kamachistanisa uk yatxatañapatakiw Josiasaxa Hilcías jilïr sacerdoter khitäna. Hulda sat warmir jisktʼiriw saräna, kunattix profetänwa. Jupax akham sasaw Josiasatakix Jehová Diosan arunakap yatiyäna: ‘Yaqha diosanakaru yupaychasin jan walinakampi phuqantapxta, Jerusalenampi taqpach markachirinakapampixa jan waltʼañaruw puripxani. Ukampis jumaxa, Josías, askïki ukwa lurtaxa, ukat uka jan waltʼäwixa jiwxäta uka qhipatwa jutani’ sasa.