YOSHIA ali fye ne myaka 8 ilyo atendeke ukuteka imikowa ibili iya bena Israele iyali ku kapinda ka ku kulyo. Ali umwaice sana. E ico pa kutampa, abakalamba balemwafwako ukuteka.

Ilyo Yoshia atekele imyaka 7, atendeke ukufwaya Yehova. Alekonka ifyalecita Davidi, Yehoshafati na Hisekia abali imfumu ishisuma. Lelo ilyo ali umwaice, ninshi talakumanya ne myaka 20, Yoshia alicitile icintu ica kupapusha.

Pa myaka iingi, abena Israele batwalilile fye ukucita ifyabipa. Balepepa tulesa twa bufi. Balekontamina utulubi. E ico Yoshia na baume bambi batendeke ukufumya ifilubi ifyo abantu balepepa. Uyu wali mulimo uukalamba pantu abantu abengi balepepa tulesa twa bufi. Mona Yoshia na baume pa cikope baletobaula ifilubi.

Pa numa, Yoshia asalile abaume batatu aba kutungulula umulimo wa kuwamya itempele lya kwa Yehova. Balisangwile indalama no kupeela abaume pa kuti bashibomfye ku mulimo wa kuwamya itempele. Ilyo balebomba pe tempele, shimapepo mukalamba Hilkia asangile icintu cimo icacindama sana mwi tempele. Asangile ibuuku lya mafunde ilyo Yehova aebele Mose ukulemba kale sana. Ili ibuuku lyalilubile pa myaka iingi.

Batwele ibuuku kuli Yoshia, kabili abebele ukuti bamubelengele. Ilyo balebelenga, Yoshia alimwene ukuti abantu tabalekonka amafunde ya kwa Yehova. Yoshia alyumfwile ububi no kulepula ifya kufwala fyakwe nga fintu ulemona pa cikope. Atile: ‘Yehova nakalipa pantu abafyashi besu tabalekonka amafunde ayalembwa muli ili ibuuku.’

Yoshia aebele Hilkia, shimapepo mukalamba ukwipusha ifyo Yehova ali no kucita kuli bena. Hilkia aile kuli Hulda, kasesema mwanakashi no kumwipusha ifyo Yehova ali no kucita. Hulda aebele Hilkia ukuyaeba Yoshia ifyo Yehova amwebele ati: ‘Umusumba wa Yerusalemu ukonaulwa kumo na bantu ababamo pantu bapepa tulesa twa bufi, kabili baikalila fye ukucita ifyabipa. Lelo apo iwe, Yoshia ulacita ifisuma, nshaonaule umusumba pali ino nshita, nkaonaula nga wafwa.’