Maana 73nan

Israɛl masakɛ ɲuman laban

JOSIYASI si tun ye san segin dɔrɔn de ye tuma min na a kɛra masakɛ ye Israɛl ka kabila fila kunna. A si tun ka dɔgɔ masaya kɛli ma. O de y’a to a ka masaya daminɛ na, mɔgɔkɔrɔba dɔw y’a dɛmɛ a ka jamana mara.

Josiyasi ka masaya san seginnan na, a y’a daminɛ ka Jehova ɲini. A tugura masakɛ ɲumanw ka misali kɔ, i n’a fɔ Dawuda, Josafat ani Ezekiyasi. K’a sɔrɔ kamalennin tun don, Josiyasi ye a ja gɛlɛya ka ko dɔ kɛ.

Israɛlkaw fanba tun juguyara kosɛbɛ waatijan kɔnɔ. U tun bɛ boliw bato. U tun bɛ u biri boliw ɲɛkɔrɔ. O kosɔn, Josiyasi ni a ka cɛw ye baara daminɛ walisa ka bato fu bɔ jamana kɔnɔ pewu. O tun ye baaraba de ye, bawo mɔgɔ minnu tun bɛ boliw bato, olu tun ka ca kosɛbɛ. I ɲɛ bɛ Josiyasi ni a ka cɛw de la yan yɔrɔ la, ka boliw karikari.

O kɔfɛ, Josiyasi ye cɛ saba bila Jehova ka batoso dila baara kunna. Wari min sɔrɔla mɔgɔw bolo, o wari bɛɛ farala ɲɔgɔn kan ka di o cɛw ma, walisa ka Jehova ka batoso dila . Ka u to baara la alabatoso kɔnɔ, sarakalasebaga kuntigi Hilkija ye fɛn nafamaba dɔ ye. O tun ye sariya kitabu yɛrɛ de ye, Jehova tun ye Musa  bila ka min sɛbɛn kabini fɔlɔfɔlɔ. O kitabu tun tununa san caman kɔnɔ.

U ye kitabu ta ka taa a di Josiyasi ma. Josiyasi ko u ka o kalan a ye. Josiyasi tun bɛ ka o lamɛn tuma min na, a y’a ye ko jamana kɔnɔmɔgɔw ma Jehova ka sariyaw mara. O y’a dusu kasi kosɛbɛ. A y’a ka duloki fara i ko i ɲɛ b’a la cogo min na yan yɔrɔ la. A ko: ‘Jehova diminnen bɛ an kɔrɔ, bawo sariya minnu sɛbɛnna nin kitabu kɔnɔ, an faw ma olu mara.’

Josiyasi ye sarakalasebaga kuntigi Hilkija bila a k’a ɲini k’a dɔn Jehova bɛna min kɛ u la. Hilkija taara kiramusoman dɔ fɛ min tɔgɔ ye ko Hulda, k’a ɲininka o ko la. Jehova ye kuma min fɔ Hulda ye, walisa Hilkija ka o lase Josiyasi ma, o filɛ: ‘Jerusalɛm ni a kɔnɔmɔgɔw bɛɛ bɛna ɲangi, bawo u ye boliw bato, u ye jamana fa kojugu la. Nka, e Josiyasi, ikomi i ye koɲuman kɛ, o ko bɛna kɛ i salen kɔfɛ.’

2 Tilew Kibaru 34:​1-28.