Lagumuhóun urúei buiti
Abahüdaguni 73
Lagumuhóun urúei buiti
WIDÜ irumu lau Hosíasi dan le larúeihanbaliñu biama türibu suruna Ísüraeli. Ñǘgili yebe lun larúeihan. Ligíati, lidan lagumeseha aba híderaguni gürigia wéinamuhaña lidan larúeihan.
Dan le arúeihali Hosíasi luagu sedü irumu, aba lagumeserun áluahei Heowá. Sigí lumuti hani urúeigu buitiñu hénpulu kei burí Dawidi, Hosafátü luma Esekíasi. Lau sun nibureingili lan meha, adügati aban katei lánina ganigi.
Luagu saragu dan wéiriti hariban hibe-agei ísüraelina. Huduguatiñu houn búngiugu mama inarünitiñu luma houn guáriua. Ábati latatirun Hosíasi hama luwügüriña agidarei áhuduraguni mama inarüniti lídangiñe ageiraü. Wéiriti wadagimanu le, ladüga gíbetiñu gürigia áhuduragutiña houn búngiugu mama inarünitiñu. Gayarati barihini Hosíasi hama luwügüriña abouchaguaña guáriua hagía.
Lárigiñe, aba lóunahan Hosíasi ǘrüwa wügüriña aransehóun litenpulun Heowá. Aba labudahoun seinsu hámagiñe lílana fulasu lun hafayeirún wügüriña ha, luagu hawadigimari. Dan le añaha lan nadagimein ténpulurugu, aba ladarirun fádiri le íñugutimabei le gíribei Ilükíasi aban katei súdiniti ñein: líburu to ñein lubéi lilurudun Heowá le meha labürügüdübei lun Moisesi saragu dan lubaragiñe dan ligía, ani féridiharu yebe.
Dan le hanügünu líburu lun Hosíasi, aba lamuriahan lun taliihoun lun. Ábati larihini luagu mawinwandun hamá lílana fulasu kei aubei larufudei lilurudun Heowá. Aba lírudun Hosíasi saragu, aba laheiridagunu ladaüragun, kei barihini lidan dibuhu. Lariñaga: ‘Gáñiti Heowá wama, ladüga magunfulirun hamuti meha wagübürigu lúrudu le bürüwañubei tidan líburu to.’
Aba lóunahani Hosíasi fádiri Ilükíasi le íñugutimabei lun lidin akutihei le lunbei ladügüni Heowá houn. Aba lidin Ilükíasi tumoun Uludá to profeta, aba lálügüdünu. Ábati tíchuguni uganu lúmagiñeti Heowá le lun, lun lanügüni lun Hosíasi: ‘Herusalén hau sun lílana habeichúba ladüga háhuduragun houn búngiugu mama inarünitiñu ani buinha ageiraü lau wuribani. Gama lumoun, amürü Hosíasi, ladüga badügüni le buidubei, miabinbei würibati le, darí danme le hilaadibu.’
2 Krónikasi 34:1-28.
