ZOZIYASI sigira masaya la Israɛl siya fila kun na tuma min na, a sii tun ye saan seegi dɔrɔn lo ye. A tun ka dɔgɔ kojugu masaya ma. O kama a daminɛ na, mɔgɔkɔrɔba dɔw y’a dɛmɛ ka jamana mara.

A ka masaya saan seeginan na, a y’a daminɛ ka Jehova ɲini. A tugura masacɛ ɲumanw seen nɔɔ na i n’a fɔ Dawuda, Zozafati ani Ezekiyasi. A saan tan ni filanan na, a ye jagwɛlɛya baara dɔ kɛ.

Kabi tuma jan, Israɛldenw fanba ka kokɛtaw tun man ɲi fewu. U tun be ngalon alaw lo bato. U tun be biri joow kɔrɔ. O kama, Zoziyasi n’a ka mɔgɔw wulila ngalon diinan kama walisa k’a ban jamana kɔnɔ. O tun tɛ kɔlɔkɔlɔ baara ye sabu ngalon alaw batobagaw tun ka ca kosɔbɛ. A filɛ jaa kan, Zoziyasi n’a ka mɔgɔw be joow karikarila.

O kɔ, Zoziyasi y’a ɲini cɛɛ saba fɛ u ka Jehova batosoba lalaga. Jama tun ye wari min lajɛn o baara kama, u y’o di o cɛɛ saba nunu ma. K’u to baara la Alabatosoba kɔnɔ, sarakalasebagaw kuntigi Ilikiyawu ye fɛɛn nafamanba dɔ sɔrɔ yen. Sariya sɛbɛ yɛrɛ tun lo, Jehova tun y’a to Musa ye min sɛbɛ galen. O sɛbɛ tun tununa kabi tuma jan.

U nana o sɛbɛ di Zoziyasi ma ani a ko u k’a kalan ale ɲɛɛ kɔrɔ. Masacɛ ye sariya sɛbɛ kɔnɔna kuma mɛn tuma min na, a y’a ye ko jama tun tɛ Jehova ka sariya labatora. Dusukasi bolo, masacɛ y’a ka faniw faran i ko i ɲɛɛ b’a la jaa nin kan. O kɔ, a y’a fɔ ko: ‘Jehova diminin be an kɔrɔ, sabu an faaw m’a ka sariyaw bato min be sɔrɔ sɛbɛ nin kɔnɔ.’

Zoziyasi y’a fɔ sarakalasebagaw kuntigi Ilikiyawu ye ko a k’a ɲini k’a lɔn Jehova ye koo min latigɛ u kama. Ilikiyawu tagara kiramuso Ulida sɛgɛrɛ. Ale y’a fɔ a ye ko a ka taga Jehova ka kuma nin fɔ Zoziyasi ye ko: ‘Bɔnɛ bena se Zeruzalɛmu n’a kɔnɔ mɔgɔw bɛɛ ma sabu u ye ne bila ka ala wɛrɛw bato ani kojugu cayara jamana kɔnɔ. Nka, komi ele Zoziyasi ye koo tilennin kɛ, o kama o bɔnɛ tɛna kɛ k’i to sii la.’