WALO a tawen laeng ni Josias idi nagbalin nga ari iti umabagatan a dua tribo ti Israel. Nakaub-ubing unay. Isu nga idi damo dagiti natataengan a tattao ti timmulong kenkuana a nangituray iti nasion.

Idi ni Josias ti nagarin iti pito a tawen rinugiannan a sinapul ni Jehova. Sinurotna ti ulidan dagiti nasayaat nga ar-ari kas ken David, Josafat ken Ezekias. Ket, uray idi isut’ maysa pay laeng a tin-edyer, nakaaramid ni Josias ti nakaturtured a banag.

Iti nabayagen kaaduan kadagiti Israelitas ti nagdakes. Agdaydayawda kadagiti ulbod a didiosen. Gapuna ni Josias ti rimmuar agraman tattao ket rinugianda nga ikkaten ti ulbod a panagdayaw manipud iti daga. Makitam ni Josias ditoy ken ti tattaona a mangburburak kadagiti bulbulto.

Kalpasanna, nangisaad ni Josias ti tallo a lallaki a mangtarimaan iti templo ni Jehova. Naurnong ti kuarta manipud kadagiti tattao a pagbayad iti trabaho. Bayat a tartarimnenda ti templo, adda nasarakan ti nangato a padi a ni Helcias a banag a nagpateg sadiay. Isut’ libro ti linteg ni Jehova nga insurat ni Moises iti nakabaybayagen. Daytay’ napukaw ti adun a tawtawen.

Indawat ni Josias a maibasa ti libro kenkuana. Bayat nga agdengdengngeg makitana a dagiti tattao saanda a salsalimetmetan ti linteg ni Jehova. Maladingitan unay iti daytoy, gapuna pinigisna ti badona, kas makitayo ditoy.

Imbaga ni Josias ken Helcias nga ammuenna no aniat’ aramiden ni Jehova kadakuada. Napan ni Helcias iti babai a ni Hulda, a mammadto a babai. Imbagana ken Helcias: ‘Ti Jerusalem ken ti intero nga ili madusada ta nagdaydayawda kadagiti ulbod a didios. Ngem dinto maaramid daytoy agingga a di matay ni Josias, ta isut’ nagaramid ti naimbag.’