WAQXAQIBʼ chihabʼ wank re laj Josias naq kiʼok chi awabʼejink saʼ wiibʼ li teep re Israel. Toj kachʼin laj Josias, joʼkan naq wankebʼ winq keʼtenqʼank re chi jolomink.

Ak wuqubʼ chihabʼ rokik laj Josias chi awabʼejink naq kiʼok chi xloqʼoninkil li Jehobʼa. Kixkʼam re rikʼin laj David, laj Jehosafat ut rikʼin laj Ezequias. Toj saaj naq kixbʼaanu jun li chaabʼil naʼlebʼ.

Chiru naabʼal chihabʼ, naabʼalebʼ laj Israel maaʼusebʼ xnaʼlebʼ. Keʼxloqʼoni ut keʼxwiqʼibʼ ribʼ chiruhebʼ li pechʼbʼil yos. Joʼkan naq laj Josias ut ebʼ laj kʼanjel chiru, keʼok xsachbʼal li bʼalaqʼil paabʼal. Li kʼanjel aʼin chʼaʼaj xbʼaanunkil xbʼaan naq, naabʼalebʼ keʼloqʼonink re li pechʼbʼil yos. Saʼ li eetalil nakʼutunk chanru yookebʼ xpukʼinkil ebʼ li pechʼbʼil yos.

Chirix chik aʼan laj Josias kixaqabʼ oxibʼ chi winq re naq teʼxyiibʼ li Rochoch li Jehobʼa. Keʼxchʼutubʼ chixjunil li tumin re li tenamit, re xtojbʼalebʼ laj kʼanjel. Naq ebʼ li winq aʼin, yookebʼ chi kʼanjelak saʼ li Rochoch li Yos; laj Hilquias, xbʼeenil aj tij, kixtaw xhuhil li chaqʼrabʼ li kikʼeheʼk re laj Moises saʼ li qʼe kutan. Li chaqʼrabʼ aʼin kisachk.

Naq keʼxkʼam li chaqʼrabʼ re laj Josias, kiraj xnawbʼal kʼaru naxye. Tojaʼ naq laj Josias kixkʼe reetal naq li tenamit moko yook ta xyuʼaminkil li xchaqʼrabʼ li Jehobʼa. Joʼkan naq kirahoʼk saʼ xchʼool ut kixpej li raqʼ joʼ nakaawil saʼ li eetalil. Chirix chik aʼan kixye: ‹Li Jehobʼa yook xjosqʼil qikʼin, xbʼaan naq ebʼ li qanaʼ qayuwaʼ inkʼaʼ keʼxyuʼami li xchaqʼrabʼ›.

Laj Josias kixtaqla laj Hilquias rikʼin xHulda, jun li ixq aj kʼanjel chiru li Yos, re xpatzʼbʼal re kʼaru tixbʼaanu li Jehobʼa rikʼin li tenamit. Li xHulda kixye re laj Hilquias kʼaru kixye li Yos: ‹Li tenamit Jerusalen ut chixjunilebʼ li wankebʼ aran tinkʼe xtojbʼalebʼ xmaak. Xbʼaan naq keʼxloqʼoni ebʼ li pechʼbʼil yos ut li Ruuchichʼochʼ kinujak saʼ maaʼusilal. Abʼan li rahilal aʼin inkʼaʼ tchalq naq toj yoʼyooq laj Josias, xbʼaan naq yook xbʼaanunkil li us›.