JOSIA aarĩ wa mĩaka ĩnana tu rĩrĩa aatuirũo mũthamaki wa mĩhĩrĩga ĩrĩa ĩĩrĩ ya Isiraeli. Ũcio nĩ ũkũrũ mũnyinyi mũno harĩ mũndũ gũtuuo mũthamaki. Kwoguo mbere aarĩ no mũhaka ateithio gwatha rũrĩrĩ nĩ andũ akũrũ.

Rĩrĩa Josia aathamakĩte mĩaka mũgwanja-rĩ, akĩambĩrĩria gũcarĩrĩria Jehova. Aarũmĩrĩire kĩonereria kĩa athamaki ega ta Daudi, Jehoshafatu na Hezekia. Hĩndĩ ĩrĩa aarĩ o wa mumo-rĩ, Josia nĩekire ũndũ wa ũcamba.

Gwa kahinda karaya Aisiraeli aingĩ maakoretwo marĩ oru mũno. Mathathaiyagia ngai cia maheni. Mainamagĩrĩra mĩhianano. Nĩ ũndũ ũcio Josia na andũ ake maathiũrũrũkire bũrũri na makĩambĩrĩria kweheria ũthathaiya wa maheni. Waarĩ wĩra mũritũ tondũ andũ aingĩ mũno maahoyaga ngai cia maheni. Mbica-inĩ ĩno no wone Josia na andũ ake makĩhehenja mĩhianano.

Thutha ũcio, Josia agĩtua andũ atatũ marũgamĩrĩre gũcokereria hekarũ ya Jehova. Mbeca ikĩũnganio kuuma kũrĩ andũ na ikĩneo arũgamĩrĩri acio irutithie wĩra ũcio. Rĩrĩa maarutaga wĩra hekarũ-inĩ, Hilikia, mũthĩnjĩri-Ngai ũrĩa mũnene, akĩona kĩndũ kĩa bata mũno. Kĩndũ kĩu nĩ ibuku rĩa watho rĩrĩa Jehova eerĩte Musa aandĩke tene, tene mũno. Rĩorĩte mĩaka mĩingĩ mũno.

Ibuku rĩu rĩgĩtwarĩrũo Josia, nake akiuga athomerũo. Na rĩrĩa aathikĩrĩirie, Josia akĩona atĩ andũ nĩmaagĩte kũrũmia watho wa Jehova. Akĩigua kĩeha mũno nĩ ũndũ ũcio, na agĩtembũranga nguo ciake, ta ũrĩa ũrona mbica-inĩ. Oigire atĩrĩ: ‘Jehova nĩatũrakarĩire, tondũ maithe maitũ matiarũmĩrĩire watho ũrĩa wandĩkĩtwo thĩinĩ wa ibuku rĩrĩ.’

Josia agĩatha Hilikia, mũthĩnjĩri-Ngai ũrĩa mũnene atuĩrie ũrĩa Jehova angĩekire. Hilikia agĩthiĩ kwĩ Hulida mũnabii mũndũ-wa-nja na akĩmũria. Mũnabii ũcio akĩmenyithia Josia ndũmĩrĩri ya Jehova: ‘Jerusalemu na andũ arĩo othe nĩmekũherithio tondũ nĩmathathaiyĩtie ngai cia maheni na ningĩ bũrũri wothe ũiyũrĩte waganu. No tondũ wee Josia, nĩ wĩkĩte wega, iherithia rĩrĩ rĩgoka thutha wa gĩkuũ gĩaku.’