YOSIYA wajingatu na myaka ya kusemwa itanu na isatu byo aikele mfumu wa bisaka bibiji bya bena Isalela ba ku kabeta ka ku bulenge. Jifumbi jo aikejilemo ke mfumu jakepele. Onkao mambo ku ntendekelo, bakulumpe bamo bamukwashishengako kulama bantu.

Yosiya byo aikele pa bufumu myaka itanu na ibiji, watendekele kukeba Yehoba. Walondejile kya kumwenako kya bamfumu bawamine nabiji Davida, Yehoshafwata ne Hezekiya. Kabiji byo akijingatu mwanyike, Yosiya waubile kintu kikatampe bingi.

Pa kimye kyabaya bingi, bena Isalela bavula baubilenga bintu byatama. Bapopwejilenga balesa ba bubela. Bafukamijilenga bankishi. Onkao mambo, Yosiya ne bantu banji bayile ne kutendeka kufumyamo mpopwelo ya bubela mu ntanda. Uno wajinga mwingilo mukatampe mambo bantu bavula bapopwejilenga balesa ba bubela. Wamona Yosiya ne bantu banji papo byo bakundawilenga ne kulalaula bankishi.

Panyuma ya bino, Yosiya wasajile banabalume basatu bakutala pa mwingilo wa kuwamisha nzubo ya Yehoba. Mali afumanga ku bantu beapananga ku bano banabalume pa mwingilo ye baingilanga. Byo baingijilenga ku nzubo ya Lesa, ñanga mukatampe, aye Hilikiya wataineko kintu kimo kyanema bingi. Wataine buku wa mizhilo yenkawa Yehoba ye aambijile Mosesa kunemba kala kene. Waelekele pa myaka yavula bingi.

Bamutwajile buku kwi Yosiya kabiji wakambizhe’mba bamutangile uno buku. Byo aumvwine byambo byajingamo, Yosiya wamwene’mba bantu kechi balaminenga mizhilo ya Yehoba ne. Kino kyamulengejile kuba bulanda, ne kutabaula bivwalo byanji byonka byo wamona papo. Waambile’mba: ‘Twamufichisha Yehoba ku muchima mambo bashakulu betu kechi balamine mizhilo yanembwa mu uno buku ne.’

Yosiya wakambizhe ñanga mukatampe, aye Hilikiya amba amwipuzhe Yehoba ne kuyuka byo afwainwe kwiboba. Hilikiya wayile ku mwanamukazhi, aye Hulada wajinga ngauzhi wa mukazhi ne kumwipuzha. Wamwambijile bino byambo kufuma kwi Yehoba ne kubwela na kubula Yosiya amba: ‘Yelusalema ne bantu bonse bakamona lukabisho mambo bapopwela balesa ba bubela ne ntanda yakumbana bubi. Bino na mambo a kuba obewa Yosiya wauba kintu kyawama, kechi ukamona luno lukabisho ne, kanatu panyuma ya kufwa kobe.’