YOSIA kimbuta kia mvu nana kakala vava kayantika yala se ntinu a makanda mole ma sude ma Isaele. Mwan’akete kikilu muna yala. Kuna lubantiku wasadiswanga kwa mbuta za wantu mu yala o nkangu.

O mvu una wa nsambwadi wa luyalu luandi, o Yosiya obantikidi tomba Yave. Watanginina mbandu za mfumu zambote nze Davidi, Yosafate ye Kizekeya. Wau kakala kindende, Yosiya wavanga diambu dia kikesa.

Tuka kolo engi muna Aneyisaele mambi kaka bavanganga. Teke basambilanga. Ozevo, o Yosiya ye ntaudi zandi obantikidi katula nsambila za luvunu muna nsi. Salu kiampwena kiakala, kadi wantu ayingi basambilanga nzambi za luvunu. Tala Yosiya ye ntaudi zandi ovava mu kosomona bena e teke.

Vava kamana velelesa nsi, o Yosiya osidi wantu atatu e kiyekwa kia vangulula tempelo. Nkangu bakubidi e nzimbu, batambikidi zo kwa wantu awaya mu sala e salu. Ekolo basalanga muna tempelo, o Kilekiya wa ngang’ambuta osolwele ma kiamfunu kikilu. I nkand’a nsiku a Yave una katuma Mose kasoneka. Kolo kiayingi wavila.

O nkanda uneto kwa Yosiya. Olombele vo watangwa. Vava kawa mambu ma nsiku o Yosiya omwene vo o nkangu ke balundanga nsiku mia Yave ko. Okendalele kikilu, otiazwini mvwatu miandi nze una omwene vava. Ovovele vo: ‘O Yave utufungidi makasi kadi o mase meto ke balunda nsiku miasonama muna nkanda wau ko.’

O Yosiya otumini Kilekiya wa ngang’ambuta kenda zaya kwa ngunza dina kekubavanga o Yave. Kilekiya wele yuvula Kuleda wa ngunz’ankento. Umvovese vo samuna e diambu dia Yave kwa Yosiya oku vo: ‘Yerusaleme ye nkangu andi tumbwa betumbwa kadi basambidi nzambi za luvunu yo zadisa nsi ye mavangu ma umpumbulu. Kansi, wau vo ongeye Yosiya ovangidi oma mambote, e tumbu kiaki kunima lufwa lwaku kaka kikwizila.’