Opi Muke Israelini Asizu Ri
A’DIKO 73
Opi Muke Israelini Asizu Ri
YOSIA ovu eli be aro eri ni ecazu opi ru enyati iri andraleru suru Israelini ma alea ria. ’Dia ovu werea ru tu ecazu opi ru. Okorisi ’ba azi angiri ’diyi koki eri ma aza angu dricezu.
Yosia ni ovuzu opiru eli aziri ’bo ria e’do Yehova ni nda. E’do eceta muke opi azi ndra oko ekile Daudi le, Yehosafati le azini Hezekia le ’diyi ni ma vuti obi. ’Di ma vutia, eri ni ovuzu karileo ni risi, Yosia nga eyo azini ’ye asi okposi.
Eli angiri ’ba Israelini kakau yi ndra ’ba onzini. Eyi mungu inzoru ’diyi inzi i. Eyi kumuti osi siriba ma drilea. Yosia nga mu ’ba ivile ’diyi pie e’do mungu inziza inzoru ’diyi onze angu ’di ma aleasi dria. ’Diri ovu azi angiri ni a’dusiku ’ba kakau eyi mungu inzoru ’diyi inzi. Mi eco ndre ra Yosia pi ’ba eri vile ’diyi pie siriba eyi onyoria va.
’Da ma vutia, Yosia o’ba ’ba na dricere ru hekalu Yehova vile ’diyi edezu ’dika. ’Ba tra silingi engazu ’ba yi vu, nga di fe ’ba ’diyi dri eyi ni ecozu ’ba azi ngapi ’diyi ofezu beni. Eyi ni azi ngaria hekalu ma alia, kuhani amboru Hilikia nga afa azini orodri ru ni isu ’daa. Eri buku azita dri drio ndra Yehova ni fele Musa ma si ri i. Eli angiri avi ndra te.
’Ba ji, buku nde Yosia dri, nga ’yo ’ba ma la eri i dri. Erini eri ria, Yosia nga ndre kini ’ba mbani Yehova ma azita ’diyi ma ta ku. Nga ovu candi si e’yo ’disi, ani nga afa suza ima rua ’diyi asi ra, mini ndrele ’di le. Nga ’yo kini: ‘Yehova ovu a’okosi ama vu, a’dusiku ama tipika obini ndra azita sile buku ’diri ma alia ri ma vuti ku.’
Yosia nga kuhani amboru Hilikia ma ti pe muzu isuzu kani Yehova ni nga a’du afa ’ye eyi be ya’ani. Hilikia nga mu oku Hulida, ovupi nabi ru ri vu, nga eri zi. Nga eri ni e’yo engapi Yehova vu ’diri olu dika fe eri ji Yosia vu kini: ‘Yerusalemu azini ’ba dria alenia ’diyi nga panga isu a’disiku eyini mungu inzoru ’diyi inzizu ri si azini e’yo onzi ni gazu angu ’di ma dria tre ri si. Te a’dusiku mi i, Yosia, mini e’yo muke ’yole risi, panga ’diri nga ni eca sawa ’disi ku kpere mi nga dra ra ka.’
