Mwangana WavaIsalele Wamwaza Wakukumishilako
Chihande 73
Mwangana WavaIsalele Wamwaza Wakukumishilako
YOSHIYA ali namyaka yitanu nayitatu hakupwa mwangana wamiyachi yaIsalele yivali yakusulo. Eyi myaka yinakehe kuli mutu kupwa mwangana. Shikaho hakavanga vakulwane navamukafwa kuyula lifuchi.
Omu Yoshiya natwame hawangana myaka yitanu nayivali hikuputuka kutondatonda Yehova. Mwaputuka kukavangiza mwalingile vamyangana vamwaza vaNdavichi, Yehoshafwate, naHezekiya. Jino, shimbu Yoshiya achili mukweze, himwahamuka.
VaIsalele vavavulu vanapunga vavapi hatando yayisuku. Valemesa tulunga vamakuli. Vanakulifukulanga kutuponya. Ngocho Yoshiya hikuya navatu jenyi nakufumisa kulemesa chamakuli mulifuchi. Ou himulimo waunene mwomwo vatu vavavulu valemesa tulunga vamakuli. Hano unahase kuvamona vaYoshiya navatu jenyi vanakupupa tuponya.
Omu nakumisa, Yoshiya hikutongola tupitau vatatu vakutala hamulimo wakuwahisa tembele yaYehova. Vatu hinavakungulula jimbongo nakujihana kumalunga vano jakuzachisa kumilimo nayilingiwa. Hakuwahisa tembele, kapilishitu wakulitulaho, Hilikiya himwawanaho chuma chachilemu. Mukanda wajishimbi jize Yehova alwezele Mose kusoneka kushikulu. Wajimbalile myakoyo.
Mukanda hikuutwala kuli Yoshiya, kaha mwalomba vamutangilewo. Hakuwivwilila, Yoshiya himwawana nge vatu kavapwilenga nakulama jishimbi jaYehovako. Hikunyengetela chikuma nakupula uvwalo wenyi, nge omu uli nakumona hano. Ngwenyi: ‘Yehova napihilila nayetu, mwomwo visemi jetu kavalaminenga jishimbi vasoneka mumukanda unoko.’
Yoshiya mwatuma kapilishitu wakulitulaho, Hilikiya awane mumwavalinga Yehova. Hilikiya hikuya kuli kapolofweto wapwevo Huluta nakumuhulisa. Mwamuhana mujimbu uno unafumu kuli Yehova autwale kuli Yoshiya, ngwenyi: ‘Yelusalema navatu vosena navavazangamisa hakulemesa tulunga vamakuli kaha lifuchi lyosena linazale naupi. Oloze ove, Yoshiya, mwomwo unalingi mwamwaza, kuzangamisa kana nachikeza kuvanga unafu.’