TZMATOQ iqʼin wajxaq abʼqʼi tuʼn Josías tej tok te ajkawil kyibʼaj qejo kabʼe kʼloj kyiyjil aj Israel. Naq chʼin abʼqʼi jlu tuʼn tok jun xjal te ajkawel. Tuʼntzunju, tej tnejilku xi onin kyuʼn tij xjal tuʼn tbʼent tkawin kyibʼaj aj Israel.

Tej otaq kawin Josías wuq abʼqʼi, ok ten jyol tiʼj Jehová. Ok lepeʼ tiʼj tbʼanel ajkawel David, Jehosafat ex Ezequías. Tej tzmatoq qʼa, bʼant jun tbʼanel tuʼn.

Tuj nim ambʼil chʼixmi kykyaqil aj Israel kubʼ kybʼinchen mya bʼaʼn. Nchi kʼulinteq kywitz nya axtok dios. In che kubʼtaq ẍmejeʼ kywitz sant. Kyjuʼtzun el tiʼn Josías kyukʼe qe xjal ateʼtaq tukʼil aju mya axixtok okslabʼil (nimbʼil). Nimtoq aqʼuntl tuʼn tbʼent, tuʼnjo nimteq xjal nchi nimen kywitz qeju nya axix dios. Lu Josías tkuʼx tuj tilbʼilal kyukʼe t-xjal, nkubʼ kybʼuchin qejo sant.

Yajxitl, e ok tqʼoʼn Josías oxe xjal tuʼn tbʼaj kybʼinchaʼn chʼintl tja Jehová. Jaw chmoʼn pwaq kyxol aj Israel tuʼntzun t-xi chjoʼn twi kykʼuʼj qe aqʼnal. Tej nchi aqʼunantoq toj tja Dios, jatz kanet jun uʼj tuʼn Hilquías aju kynejel pal, ateqju uʼj jatumel tzʼibʼinqekux tley Jehová ajo kyaj ttzʼibʼen Moisés ex aju otaq kubʼ naj.

Tej t-xi qʼiʼn uʼj twitz Josías, xi tqʼmaʼn tuʼn tjaw schʼiʼn (uʼjin). Tej tbʼaj tbʼiʼn Josías aju ntqʼamaʼn uʼj, el tnikʼ qa mitiʼ otaq kubʼ kybʼinchen aj Israel aju tkawbʼil Jehová. Tzaj nim tbʼis Josías, tuʼntzun jlu el tlaqin t-xbʼalin aju toktaq tiʼj, ik tzaʼnj tkuʼx tuj tilbʼilal. Ex tma kyjalu: ‹Nimxixlo tqʼoj Jehová ma tzaj qiʼj, tuʼnju mintiʼ xi kyqʼoʼn kywiʼ qxeʼchel tiʼj ju yol in tmaʼn tuj uʼj lu, ex mintiʼ o japun kyuʼn tkyaqil yol tzʼibʼan tuj›.

Xi tsamaʼn Josías aju pal Hilquías tuʼntzen tok tbʼiʼn tiʼtaq tzul kyiʼj tuʼn Jehová. Tejtzun tpon Hilquías tukʼe Huldá aju tsanjel Dios, tzaj tqʼamaʼn Huldá aju otaq tzaj tqʼamaʼn Jehová te, tuʼntzun t-xi tqʼamaʼn Hilquías te Josías aqejo yol lu: ‹Ktzajil nsamaʼne mya bʼaʼn tibʼaj tnam Jerusalén ex kyibʼaj qe xjal najleqe tuj, tuʼnju ma chi kʼulen twitz mya axixtok dios ex ma kubʼ noj twitz txʼotxʼ tuʼn mya bʼaʼn. Tuʼnju tbʼanel ma bʼent tuʼna Josías, aju kastiw kbʼel nqʼoʼne kyibʼaj xjal tzmaxi tzul wiʼne aj tkyima›.