Zistwar 73

Dernie Bon Lerwa Israël

YOSHIYA ena selman wit an kan li vinn lerwa lor de tribi Israël dan lesid. Me li tro zenn pou vinn lerwa. Alor, dan koumansman de-trwa dimounn ki ena plis lexperyans ed li pou diriz pei.

Apre ki Yoshiya regne pandan set an li koumans rod Jéhovah. Li swiv lexanp bann bon lerwa kouma David, Yehoshaphat ek Hizqiya. Apre sa, kan li ti ankor enn adolesan, Yoshiya fer enn kitsoz ki demann boukou kouraz.

Pandan enn bon bout letan laplipar Izraelit ti bien move. Zot ti ador bann fos bondie, ek zot ti prostern zot devan bann zidol. Alor, Yoshiya ek so bann zom koumans tir bann fos bondie dan pei. Se enn gran travay parski boukou dimounn ti pe ador bann fos bondie. To kapav trouv Yoshiya ek so bann zom pe detrir bann zidol.

Apre sa, Yoshiya met trwa zom an-sarz pou repar tanp Jéhovah. Lepep donn kas pou pey bann zom ki pou fer sa travay-la. Pandan ki zot pe travay dan tanp, gran pret Hilqia al remark enn kitsoz bien inportan laba. Li trouv liv lalwa ki Jéhovah ti donn Moïse inn gagn bien lontan. Sa liv-la ti perdi depi boukou lane.

Kan Hilqia amenn sa liv-la, Yoshiya demann li lir sa. Pandan ki li pe ekoute, Yoshiya realize ki lepep pa’nn gard lalwa Jéhovah. Akoz sa li bien tris ek li desir so linz, parey kouma to trouve lor zimaz. Li dir: ‘Jéhovah ankoler ar nou, parski nou bann gran dimounn pa’nn gard bann lalwa ki’nn ekrir dan sa liv-la.’

Yoshiya donn lord gran pret Hilqia pou kone ki Jéhovah pou fer zot. Hilqia al get profetes Houlda. Houlda dir li donn Yoshiya sa mesaz ki Jéhovah inn done la: ‘Jérusalem ek lepep an antie pou gagn enn pinision parski zot finn ador bann fos bondie ek pei finn ranpli avek mesanste. Me akoz twa, Yoshiya, to’nn fer seki bon, sa pinision-la pou vinn lor zot apre to lamor.’

2 Chroniques 34:1-28.