Israel Ra Las King Pain Ba
Sturka 73
Israel Ra Las King Pain Ba
JUSAIA ba, Israel kyamka wal waupasa wina kan ba king aimakan pyua ra, 8 mani baman bri kan. Witin uba tuktan kan king aimakaia. Baha mita, taura upla almuk nani bui help munan taun king aimakbia dukyara.
Jusaia ba king aimaki 7 mani bri kan pyua ra, Jehova ra plikan. King pain nani Debit, Jusapat bara Isikaya daukanka nani baku nina blikan. Witin tuktan kan, sakuna diara kum daukaia karna kan ba daukan.
Pyu ailal ra, Israel uplika aihkika ba, uba saura bangwi kan. Gâd kuninkira nani ra mayuni kan. Aidul nani ra aimakupi kan. Baku bara, Jusaia ai uplika nani aikuki, kuntri ba wina gâd kuninkira nani ra mayunan laka dauki kan ba, saki bangwan. Naha ba wark tara kum kan, kan upla ailal ba gâd kuninkira nani ra mayuni kan. Naha ra Jusaia bara ai waitnika nani aidul nani ra baiki tiki ba man sip sma kaikaia.
Baha ningkara, Jusaia mita Jehova tempelka ba waitna yuhmpa mihta ra mangkan kli paskaia. Upla nani wina lalah kalik muni, waitnika nani ra yaban warkka dauki ba mana aibapbia. Witin nani tempel ra wark taki kan pyua ra, prîst wihtka Hilkaia ba kulkanka tara dukya kum sakan: blasi pyua ra Jehova mita Moses ra lâ nani ulbi yaban ba, sin bukka tiwan kan ba.
Bukka ba Jusaia ra brihwan taim, witin makaban aisi kaikbia. Witin walan taim, kaikan upla nani ba Jehova lâka nani ba alki briras kan. Witin uba sari taki, ai praka ba kalkan, man kaikisma ba baku. Bara win: ‘Jehova bui yawan mapara ai kupia sauhkan sa, wan almukka nani ba, ai lâka nani naha ra ulban na alki briras kan ba mita.’
Ningkara, Jusaia mita prîst wihtka Hilkaia ra blikan Jehova ba dia daukaisa sapa tanka pliki kaikbia dukyara. Hilkaia ba prapit mairin Hulda ra wih makabi walan, bara witin win, naha maisapahkanka na Jehova wina aula Jusaia ra wih wibia dukyara: ‘Jerusalem bara taun uplika aiska ba panis munan kabia, kan witin nani ba gâd kuninkira nani ra mayuni, taun aiska ba saurka laka ni bangkan. Sakuna man Jusaia, diara kasak ba daukram mita, naha paniska ba man pyuam ra balbia apia, man pruma ningkara balbia.’
