Tanojnots 73

Ika tamika imin kuali tekiuaj israelitas

JOSÍAS sayoj kipiaya chikueyi xiuit keman mochiuak imin tekiuaj ome kalyetouanij israelitas. Maj aksa ijkon mochiuani tekiuaj eskia tel konetok. Yejika, yekinika seki takamej kipaleuijkej maj kinixyekana israelitas.

Keman Josías tekiuajtikaya chikome xiuit, peuak kitemoua Jiova. Kitojtokak imin neskayo tekiuanij tein yolkualmej kemej David, Josafat uan Ezequías. Satepan, maski katka telpoch, kichiuak teisa ika yolchikaualis.

Tel miak xiujmej, miakej israelitas katkaj amo yolkualmej. Moixpilouayaj imin ixpan tiotsitsin uan kiniueyichiuayaj. Yejika Josías uan itekitikauan peuak kijkuaniaj taueyichiualis tein amo melauak itech nochi Israel. Katka se ueyi tekit, ta miakej israelitas kiniueyichiuayaj tiotsitsin. Nikan ueli tikita Josías uan itekitikauan keniuj kintatapatstokej tiotsitsin.

Satepan, Josías kintekimakak eyi takamej maj kiyekchiuanij itemplo Jiova. Kisentilijkej imin tomin israelitas uan kinimakakej nejin takamej maj ika taxtauanij tekit tein mochiuaya. Keman yejuan tekititoyaj itech templo, tayekankej tiopixkat Hilquías kiajsik teisa tein kitelpiaya ipatiuj: kiajsik amaix tein poliujtoya uan kipiaya itanauatiluan Jiova, tein kiiluijka Moisés maj kijkuilouani miak xiujmej achtoya.

Keman Josías kiuikilijkej amaix, tajtanik maj kixtajtoltilianij. Keman kikakik, uelik kiitak ika israelitas amo kitakamattoyaj itanauatiluan Jiova. Yejika motayokoltij uan kitsayanak itaken, kemej tikita itech taixkopin. Kijtoj: ‘Tikualantijtokej Jiova, porin touejkaujtatuan amo kitakamatkej tanauatilmej tein ijkuiliujtokej itech nejin amaix’.

Josías kinauatij tayekankej tiopixkat Hilquías, maj tajtaniti toni yaya kinchiuiliti Jiova. Hilquías kitajtanito siuatanauatijkej Huldá. Uan yej kimakak Hilquías nejin tajtolmej tein Jiova kiiluij Huldá maj kimatiltiani Josías: ‘Dios kitatsakuiltiti Jerusalén uan nochin israelitas porin kiniueyichiuaj tiotsitsin uan kimoyaujkejya tachiualismej tein amo kuali. Sayoj ika tejua, Josías, kemej tikchiujtok tein kuali, nejin tatsakuiltilis amo ualas axkan, ta satepan keman timomikilis’.

2 Crónicas 34:1-28.