TLAPOUALISTLI 73

Saiktlami ueyi tekiua yolkuali itech Israel

JOSÍAS san okipiaya chikueyi xiuitl ijkuak omochi ueyi tekiua itech ome inechikoluan altepetl Israel. Ok chokotsin pampa mochiuas ueyi tekiua. Ik non, ijkuak peua tlanauatia sekimej tlaltikpaktlakamej akinmej okachi yikipiaj xiuitl kipaleuiaj pampa ma tlanauati itech altepetl.

Ijkuak Josías yokipiaya chikome xiuitl ken ueyi tekiua, ijkuakon opejki kichiua ken Jehová kijtoa. Okichi ijkon ken okichijkej ueyi tekiuajkej yolkualmej David, Jehosafat uan Ezequías. Ijkuak ok okatka telpochtli okichi se tlamantli tlen okiteititi iyolchikaualis.

Yokipiaya miak xiuitl israelitas okichiuayaj miak tlamantli tlen amo kuali. Okinueyichiuayaj uan omotlankuaketsayaj inmixpan teotsitsintin. Ik non, Josías uan akinmej okipaleuiayaj opejkej kikachiuaj itech altepetl tlaneltokalistli tlen amo melauak. Nin se ueyi tekitl pampa miakej tlaltikpaktlakamej okinueyichiuayaj teotsitsintin. Itech tlaixkopinal ueli tikita Josías uan akinmej okipaleuiayaj ken kinxixiniaj teotsitsintin.

Satepan, Josías okinnauati eyi tlakamej ma kiyektlalikan iteokali Jehová. Okololojkej tomin itech altepetl uan okintlaxtlauijkej ninmej eyi tlakamej tlen otekitikej. Ijkuak otekitiayaj itech teokali, ueyi teopixki Hilquías okajsik amochtli tlen okipiaya itlanauatil Jehová tlen yokipiaya miak xiuitl Moisés okijkuilo, amochtli tlen opolitoka.

Ijkuak okiuikakej amochtli ixpan Josías, ye okijto ma kitlajtoltilikan. Ijkuak Josías okikak, okimatki altepetl amo okitlakamatijtokaj itlanauatil Jehová. Josías omoyolkoko miak, uan ik non, okitsayanki itlaken, ijkon ken tikita. Okijto: “Jehová kualantok touan, pampa totatajuan amo okitlakamatkej tlanauatilmej tlen ijkuilijtokej itech nin amochtli”.

Josías okinauati ueyi teopixki Hilquías ma tlajtlani tlen kinchiuiliskiaj Jehová. Hilquías okitato siuatl teotlajtojki Huldá, uan okitlajtlani. Huldá okimatilti tlen Jehová okilui pampa kimatiltiskia Josías: “Jerusalén uan nochi altepetl kitlajyouiltiskej pampa okinueyichijkej teotsitsintin uan itech nochi altepetl onka miak tlamantli tlen amo kuali. Maski ijkon, pampa te Josías yotikchi tlen kuali, axan amo tlajyouiskej, tlajyouiskej satepan timikis”.

2 Crónicas 34:1-28.