INdaba 73: IKosi Yamaswaphela Yakwa-Israyeli Elungileko
UJOSAYA bekaneemnyaka ebunane ubukhulu lokha aba yikosi yesewula yeentjhaba eembili zakwa-Israyeli. Mncani khulu imnyaka le bona umuntu angaba yikosi. Ngalokho ekuthomeni gade arhelejwa babantu esele bakhulile bona abuse isitjhaba.
Lokha uJosaya nasele abe yikosi iimnyaka elikhomba wathoma ukufuna uJehova. Walandela isibonelo samakhosi amahle anjengoDavidi, uJehoshafati noHezekiya. Yeke-ke, lokha aseselisokana, uJosaya watjengisa isibindi.
Besele kusikhathi eside ama-Israyeli enza izinto ezingakalungi. Bebakhulekela abozimu bamala. Bebakhulekela iinthombe. Ngalokho uJosaya wakhamba namadodakhe bathoma ukususa koke ukukhulekela kwamanga enarheni. Lo, gade kumberego omkhulu ngombana gade babanengi khulu abantu abebakhulekela iinthombe. Ungambona la uJosaya namadodakhe baphadlha iinthombe.
Ngemva kwalokho, uJosaya wabeka amadoda amathathu bona alawule umsebenzi wokwakhiwa kwetempeli lakaJehova. Imali gade ikolegwa ebantwini inikelwa amadoda la bona abhadele umberego ozokwenziwa. Kuthe lokha nebasaberega etempeleni, umpristi ophakemeko uHilikiya wafumana into eqakathekileko lapho. Bekuyincwadi yomthetho leyo uJehova alayela bona uMosisi ayitlole esikhathini eside khulu esadlulako. Besele kumnyaka eminengi yalahleka.
Incwadi leyo yayiswa kuJosaya, wabawa bona bamfundele yona. Njengombana bekalalele, uJosaya wabona bona abantu gade bangawubulungi umthetho kaJehova. Kwamdanisa khulu lokho, ngalokho warathula iimbatho zakhe phakathi, njengombana umbona la. Wathi: ‘UJehova usikwatele, ngombana abobaba khenge bayibulunge iimthetho etlolwe encwadini le.’
UJosaya walayela umpristi ophakemeko uHilikiya bonyana afumane bona khuyini uJehova azoyenza kibo. UHilikiya waya emfazini okunguHulida, obekamphorofidi omsikazi, wayombuza. UHulida wamnikela umlayezo lo ovela kuJehova bona awudlulisele kuJosaya: ‘IJerusalema nabo boke abantu bazokufumana isibetho ngombana gade bakhulekela abozimu bamala begodu inarha yoke sele izele ubumbi. Kodwana ngombana wena Josaya, wenze okulungileko, isebethwesi ngeze sifike bekube kulapho wena sele uhlongakele.’
2 Imilando 34:1-28.
Iimbuzo
- Gade amdala kangangani uJosaya nekaba yikosi, begodu yini athoma ukuyenza nekayikosi iimnyaka elikhomba?
- Wenzani uJosaya esithombeni sokuthoma?
- Umpristi omkhulu wafumanani lokha amadoda nekalungisa itempeli?
- Kubayini uJosaya arathula iimpahla zakhe?
- Ngimuphi umlayezo kaJehova umphorofidi uHulida awunikela uJosaya?
Iimbuzo engezelelekileko
- Funda 2 Imilando 34:1-28.
Ngisiphi isibonelo uJosaya asibekela labo abakhula budisi? (2 Imila. 33:21-25; 34:1, 2; AmaRh. 27:10)
Ngiwaphi amagadango aqakathekileko uJosaya awathathako bona aragekisele phambili ukukhulekela kweqiniso ngomnyaka wesi-8, ngomnyaka wesi-12 nangomnyaka wesi-18 wokubusa kwakhe? (2 Imila. 34:3, 8)
Esibonelweni esabekwa yiKosi uJosaya noMpristi oMkhulu uHilikiya, singafundani malungana nokubulunga indawo yethu yokukhulekela ihlwengekile? (2 Imila. 34:9-13; Iziy. 11:14; 1 Kor. 10:31)
