JOSIA ankho una vala omanima etyinana, puetyi alinga ohamba yomihoko vivali vio Isilayeli. Ankho omona unene pala okukala ohamba. Moluotyo, ovanthu vamue ovakulu, avemukuatesako okutumina otyilongo.

Etyi papita omanima epanduvali, Josia ahimbika okuovola Yehova. Okulandula onongeleka mbono hamba onongwa, nga David, na Jeosafa na Ezekia. Puetyi nkhele omukuendye, Josia walinga otyipuka tyimue ankho tyesukisa omutima wakola.

Mokuenda kuomuvo omunyingi ova Isilayeli ovanyingi, ankho valinga ovipuka ovivi unene. Ankho vafenda ono huku mbomatutu, novilolo. Moluotyo, Josia novanthu vae, avahimbika okupola enfendelo liomatutu motyilongo. Ankho ovilinga vimue ovinene, mokonda ovanthu ovanyingi ankho vafenda ono huku mbomatutu. Josia oyou apa tala novanthu vae, vekahi nokuhanyauna ovilolo.

Konyima, Josia waholovona ovalume vetatu opo vatumine ovilinga viokuviukisa ondyuo ya Yehova. Ovanthu ankho vaava onombongo. Iya onombongo ombo ambupewa ovalume ovo vetatu, opo vafete ovilinga ankho vikahi nokuundapwa mondyuo ya Huku. Puetyi ankho vekahi nokuundapa mondyuo ya Huku, Hilkia o saserdote wavasamo otyipuka tyimue tyakolela unene. Wavasa omukanda wovitumino Yehova atumine Moisesi okuhoneka. Omukanda oo ankho wavomba omanima omanyingi.

Omukanda oo aveutuala ku Josia. Iya Josia aiti vemutangeleo. Etyi Josia atehelela onondaka ombo, anoñgonoka okuti ovanthu ankho kavekahi nokuendela movitumino via Yehova. Josia anumana unene, atandula otyikutu tyae, ngetyi weete polutalatu apa. Ati: ‘Yehova wanumana noonthue. Mokonda ovo tate yetu kavaendelele movitumino viahonekwa momukanda ou.’

Josia atumu o saserdote Hilkia akatehelele oityi Yehova mevelingi. Hilkia aende okukapula komukai umue omuuli, ankho utiwa o Hulda. Iya Hulda emupopila onondaka mbatunda ku Yehova, opo Hilkia ekembutolele Josia, ati: ‘O Jelusalei novanthu vatyo aveho, mavahitiswa. Mokonda vafenda ono huku mbomatutu, pahe otyilongo atyiho tyeyula ovivi. Mahi, ehitiso olio kamaliya pononthiki mbove Josia, mokonda walinga etyi tyaviuka.