JOSIAS mi pe̱ꞌtsi hñäto nje̱ya nuꞌmu̱ bi zo̱ho̱ bi mända ha nuꞌu̱ yoho yä tꞌu̱kä hnini de rä sur ha Israel. Hingä mi pe̱ꞌtsitho rä je̱ya pa xä zo̱ho̱ xä ndä. Hänge rꞌa yä jäꞌi bi matsꞌi pa bi mända nuꞌu̱ yä hnini mientra bi te.

Yoto nje̱ya mꞌe̱fa, Josias bi mu̱di bi hyoni Jeoba ja ngu xki me̱fi Dabid, Jeosafat ꞌne Esekias. Mi metsitho Josias nuꞌmu̱ bi ꞌñudi ge hingä mi tsu ꞌne bi ja nꞌa rä tꞌo̱tꞌe.

Po ndunthi yä je̱ya, ndunthi yä israelita bi me̱fi yä tsꞌo tꞌo̱tꞌe. Mi xo̱kämbeni ꞌne mi ndäne nuꞌu̱ yä zidada hingä mäjuäni. Hänge Josias ꞌne märꞌa yä ñꞌo̱ho̱ bi mu̱di bi hñäki nuꞌu̱ yä zidada hingä mäjuäni. Näꞌä bi me̱fi xa mi xä ñhei ngeꞌä xi mi ndunthi nuꞌu̱ yä jäꞌi mi xo̱kämbeni nuꞌu̱ yä zidada hingä mäjuäni. Ja ngu gi handi ha rä kꞌoi, Josias ꞌne nuꞌu̱ märꞌa yä ñꞌo̱ho̱ bi tehmi nuꞌu̱ yä zidada hingä mäjuäni.

ꞌNepu̱, Josias bi mändabi hñuu yä ñꞌo̱ho̱ dä hyoki habu̱ xki tsꞌoki näꞌä rä templo Jeoba. Bi mhuntsꞌi yä bojä ha rä hnini ꞌne bi umbi nuꞌu̱ hñuu yä ñꞌo̱ho̱ pa dä guꞌti yä me̱fi. Mientra mi mpe̱fi nuꞌu̱ yä jäꞌi ha rä templo, näꞌä däta majhä mi rä thuhu Ilkias bi dini näꞌä mfistꞌofo xki mꞌe̱di, habu̱ xki yꞌofo Moises nuꞌu̱ yä mhända Jeoba.

Mi tꞌumbäbi Josias näꞌä mfistꞌofo, bi yꞌadi toꞌo dä hñeti. Josias bi ungä ngue̱nda ge yä jäꞌi hingä xki yꞌo̱te yä mhända Äjuä. Xi bi durämu̱i ꞌne bi ntso̱ꞌmi, hänge bi tu̱ni yä dutu ja ngu gi handi ha rä kꞌoi. Bi ꞌñenä: “Jeoba di nkue̱ kongekhu̱, ngeꞌä mä dadahu̱ himbi yꞌo̱de nuya yä mhända hutsꞌi ha nunä mfistꞌofo”.

Josias bi mändabi Ilkias ge dä ñꞌani te ma kastigo ma dä me̱hni Jeoba. Ilkias bi ma bä ambäbi nꞌa rä mꞌe̱hni Jeoba mi rä thuhu Ulda. Nunä ꞌme̱hñä bi xipi Ilkias näꞌä raso xki uni Jeoba pa dä sipi Josias, näꞌä raso mi enä: “Jerusalen ꞌne gatꞌho rä hnini ma gä kastiga ngeꞌä xä ndäne nuꞌu̱ yä zidada hingä mäjuäni ꞌne gatꞌho rä hnini xä ñudi ko rä ntsꞌomꞌu̱i. Pe nuꞌi Josias, xkä pe̱fi näꞌä xä ñho, hänge näꞌä kastigo hingä ma gi hyandi, ma dä ꞌñepu̱ mꞌe̱fa de gi tu”.