JOSIAH hem eit year nomoa taem hem kamap king bilong tufala tribe bilong Israel long south. Hem young tumas for kamap king. So firstaem samfala man wea moa olo helpem hem for rulim datfala nation.

Taem Jo·siʹah hem king for sevenfala year finis, hem start for lukaotem Jehovah. Hem followim example bilong olketa gudfala king olsem David, Jehoshʹa·phat and Hez·e·kiʹah. Then, taem hem young yet, Jos·iʹah duim wanfala samting wea showimaot hem no fraet.

For longfala taem nao plande Israelite olketa nogud tumas. Olketa worshipim olketa giaman god. Olketa baodaon long olketa idol. So Jo·siʹah go witim olketa man bilong hem and start for aotem giaman worship from datfala land. Diswan hem bigfala waka from plande pipol worshipim olketa giaman god. Iu savve lukim Jo·siʹah and olketa man bilong hem long piksa wea pisisim olketa idol.

Bihaen, Jo·siʹah markem thrifala man for fixim temple bilong Jehovah. Olketa kolektem selen from pipol and givim long olketa man hia for baem samting for waka wea olketa bae duim. Taem olketa gohed for waka long temple, hae priest Hil·kiʹah faendem samting wea important tumas. Hem nao buk bilong law wea Jehovah hem markem Moses for raetem longfala taem go finis. Hem lus for plande year.

Olketa tekem disfala buk long Jo·siʹah, and hem askem olketa for readim long hem. Taem hem lisin, Jo·siʹah luksavve hao olketa pipol no obeyim olketa law bilong Jehovah. Hem feel sorre tumas abaotem diswan, so hem brekem kaleko bilong hem, olsem iu savve lukim long hia. Hem sei: ‘Jehovah hem kros witim iumi, bikos olketa dadi bilong iumi no keepim olketa law wea stap insaed long disfala buk.’

Jo·siʹah komandim hae priest Hil·kiʹah for faendemaot samting wea Jehovah bae duim long olketa. Hil·kiʹah go long Hulʹdah, wanfala woman wea hem profet, and askem hem. Hulʹdah talem disfala message from Jehovah for tekem go bak long Jos·iʹah: ‘Jerusalem and evri pipol bae kasem panis bikos olketa worshipim olketa giaman god and land hem fulap witim nogud fasin. Bat from iu, Jo·siʹah, iu duim samting wea gud, disfala panis bae kam bihaen long taem wea iu dae.’