JOSIASQA pusaq watachayoq kachkaspanmi sur law Juda nacionpi iskay ayllukunapa reynin karqa. Warmachallaraqmá chay reyqa karqa. Chaymi kamachikuyta qallarichkaptin paytaqa yuyayniyoq runakuna yanaparqaku Juda nacionta kamachinanpaq.

Hinaspanmi qanchis watata kamachikuchkaspanña, Josiasqa Jehová Diosta maskarqa. Allin ruraq rey David, rey Josafat chaynataq rey Ezequiaspa rurasqanman hina paypas rurarqa. Mozollaraq kachkaspanmi qarinchakuspa allin kaqta rurarqa.

Unaytañam yaqa llapallan Israel casta runakunaqa mana allin ruraq karqaku. Taytacha-mamachakunapa ñawpaqninpi qonqorakuykuspanku yupaycharqaku. Hinaptinmi Josiasqa runankunawan Juda nacionmanta taytacha-mamachakunata wischumurqa. Sasa ruraymi chayqa, achka runakuna taytacha-mamachakunata yupaychaptinku. Chay dibujopim Josiasqa runankunawan pakipachkanku taytacha-mamachakunata.

Chaymanta Josiasqa kimsa runakunatam kamachirqa templota allichanankupaq. Hinaspa llaqtamanta qollqetapas huñuchimuspa chay runakunaman qorqaku templopi llamkaqkunaman paganankupaq. Templopi llamkanankukama sacerdotekunapa jefen Hilciasmi Moisesnintakama Jehová Diospa qosqan yachachikuy chinkasqa librota tariramurqa.

Hinaptinmi chay tarisqanku librota Josiasman aparuptinku payqa leepunankupaq mañakurqa. Leesqankuta uyariruspanmi musyarqa Jehová Diospa kamachikuyninkunata llaqtan mana kasukusqankuta. Hinaptinmi sinchita llakikuspa pachanta dibujopi qawasqaykiman hina llikispan nirqa: ‘Kay libroman hina abuelonchikkuna mana kasukusqankuraykum Jehová Diospa piñakuyninqa contranchikpi mancharikuyllapaqña kachkan’ nispa.

Chaymi Sacerdotekunapa jefen Hilciasta kamachirqa mana kasukusqankumanta Jehová Dios llaqtanta imam rurananta yachamunanpaq. Hinaptinmi Hilciasqa pasarqa Diosmanta willakuq Hulda sutiyoq warmita tapunanpaq. Payñataqmi Jehová Diospa nisqanta Josiasman willamunanpaq Hilciasman kaynata nirqa: ‘Juda nacionpi runakunamanmi castigota apachimusaq huk rikchaq taytachakunamanña inciensota kañapusqankumanta chaynapimá mana allin ruraykuna allpapiqa huntarurqa. Ichaqa qamqa ñoqata kasukuwasqaykimantam hawka tiempollapim wañukuspa castigo apachimusqaytaqa manam rikunkichu’ nispa.