E VARU rai o Iosia mataiti i riro mai ei aia ei ariki no nga kopu e rua o te apatonga o Iseraela. E tu tamariki roa teia nona kia riro ei ariki. No reira i te akamata anga kua tauturu tetai aronga pakari iaia kia tutara i te iti tangata.

I tona ariki anga no tetai itu mataiti kua akamata a Iosia i te kimi ia Iehova. Kua aru aia i te akaraanga a te au ariki meitaki mei ia Davida, Iehosaphata e Hezekia. E oti, iaia rai e mapu tamariki ra, kua rave a Iosia i tetai apinga ngakau toa.

No te au tuatau roa e kino tikai te maata anga o te au tangata Iseraela. Kua akamori ratou i te au atua pikikaa. Kua tupou ratou ki raro i te au itoro. No reira kua aere a Iosia e tona au tangata i te takore i te akamorianga pikikaa i roto i te enua. E aka angaanga teia no te mea e maata tikai te tangata e akamori ra i te au atua pikikaa. Te kite ra koe ia Iosia e tona au tangata i konei e vavai ra i te au itoro.

Muri mai, kua tuku a Iosia e toru tangata kia akaaere i te patu akaou i te iero o Iehova. Kua koiia te moni mei te tangata e kua orongaia ki teia au tangata ei tutaki no te angaanga te ka raveia. Ia ratou e angaanga ra ki runga i te iero, kua kite mai te taunga maata ko Hilikia i tetai apinga puapinga tikai i reira. Ko te puka ture tikai ta Iehova i akaue ia Mose kia tata i te au tuatau i topa. Kua ngaro ana te reira no tetai au mataiti e manganui.

Kua apaiia te puka ki ko ia Iosia, e kua pati aia kia tatauia te reira kiaia. Iaia e akarongo ra, kua kite mai a Iosia e kare te tangata i akono ana i te ture a Iehova. Taitaia tikai aia no teia, e kua aae i tona kakau mei taau e kite ra i konei. Karanga aia e: ‘Kua riri a Iehova ia tatou, no te mea kare to tatou au metua i akono ana i te au ture tei tataia ki roto i teia puka.’

Kua akaue a Iosia i te taunga maata ia Hilikia kia kimi mai e eaa ta Iehova ka rave kia ratou. Kua aere atu a Hilikia ki ko i te vaine ko Hulada, e peroveta vaine i te ui atu kiaia. Kua oronga mai aia i teia karere no ko ia Iehova kia apai atu ki ko ia Iosia: ‘Ka akautungaia a Ierusalema e te au tangata pouroa no te mea kua akamori ratou i te au atua pikikaa e kua ki te enua i te kino. Inara no te mea kua rave koe e Iosia i te meitaki, ka tupu teia akautungaanga i muri ake i toou matenga.’