JOSIAS ayeke lani gi na ngu miombe tongana lo ga gbia na ndo ti royaume ti akete mara use ti Israël. Ngu ti lo ayeke kete mingi ti duti gbia. Tongaso, akota zo amû maboko na lo ti komande na ngoi so lo de kete.

Tongana Josias aduti gbia ngu mbasambala awe, lo komanse ti gi Jéhovah. Lo mû peko ti tapande ti anzoni gbia tongana David, Josaphat na Ezéchias. Na pekoni, tongana Josias akono kete awe, lo sara mbeni kota ye.

Teti angu mingi, azo ti Israël mingi asara sioni ahon ndo ni. Ala voro anzapa ti wataka nga na ayanda. Tongaso, Josias asigigi, lo na azo ti lo, na ala komanse ti zi vorongo ti wataka na yâ ti kodoro ni. A yeke mbeni kota kua ngbanga ti so azo ni mingi avoro anzapa ti wataka. Bâ Josias na azo ti lo na fango yâ ti ayanda ni kete kete.

Na pekoni, Josias azia azo ota na ndo ti kusala ti lekengo temple ti Jéhovah ti tene a kiri a ga nzoni. A ro nginza na tïtî azo na a mû ni na akoli ota so ti futa na aye ti kusala ni. Na ndembe so ala yeke sara kua na yâ ti temple ni, kota prêtre Hilkijah awara mbeni ye na yâ ni so ayeke tâ kota ye mingi. A yeke tâ gi mbeti ti ndia so Jéhovah ahunda na Moïse ti sara ni ândö giriri. A sara ngu mingi awe si mbeti so agirisa.

A gue na mbeti so na Josias, na lo hunda ti tene a diko ni na lo. Tongana lo yeke mä atënë ti yâ ni, Josias abâ so azo abata andia ti Jéhovah pëpe. Ye so azia vundu mingi na bê ti lo, si lo suru bongo na tere ti lo, tongana ti so mo bâ na lê ti foto so. Lo tene: ‘Ngonzo asara Jéhovah na tere ti e, ngbanga ti so akotara ti e abata andia so ayeke na yâ ti mbeti so pëpe.’

Josias atene na kota prêtre Hilkijah ti hinga ye so Jéhovah ayeke sara ande na ala. Hilkijah ague abâ wali-prophète Hulda, na lo hunda tënë na lo na ndo ni. Hulda atene na lo ti tene peko ti tënë ti Jéhovah so na Josias: ‘Kota ye ti vundu ayeke si na Jérusalem nga na azo ni kue ngbanga ti so ala voro anzapa ti wataka na ala sara si sese ni asi singo na aye ti sioni. Me ndali ti so mo, Josias, mo sara ye ti nzoni mingi, vundu so ayeke si pëpe juska mo kui si.’