Tantara 73

Mpanjaka Soa Fanahy Farane Tamin’israely Teo

VO VALO tao Josia le fa natao mpanjaka tamy fanjakà’ty foko roe antìmo, tamin’Israely teo. Mbo anak’ajà maré ie tamy fotoa io, ka nisy olobé maromaro nanampy aze mba hitarike vahoake reo, tamy voalohane.

Laha fa nifeno fito tao ty naha-mpanjaka an’i Josia, le nanomboke nila an’i Jehovah ie. Nanarake ty ohatse soa napetra mpanjaka taloha reny ie: Davida, Josafata, noho Hezekia. Laha fa nihabe Josia, le nisy raha nila herim-po tokone hataone.

Niraty fanahy iaby ty ankamaroan’Israelita reo, tanaty fotoa elaela. Nivavake tami-ndranahare diso roze sady nandohalike tamy sampy kea. Ka, nanomboke nangalake sampy reo tsy ho amy tany misy an-droze eo sasy Josia noho ty mpanompone. Sarotse asa io, satria maro biby ty olo nivavake tami-ndranahare diso. Hitanao amy sary io Josia noho ty mpanompone manorotòro sampy reny.

Tafara raha zay, le nifìly lahilahy telo Josia, mba hikarakara ty fanamboara tempolin’i Jehovah iny. Baka amy vahoake ro nangoròna drala hanamboara tempoly io. Nahita boky niavake Hilkia mpisoronabe tamy fotoa mbo nikarakarà, noho nanamboaran’olo reo, tempoly io. Boky nisy ty lalàn’i Jehovah, nosoratan’i Mosesy fa ela biby iny io. Fa an-taone maro ty tsy nahità boky io.

Nandesy tamin’i Josia tany boky io, bakeo nangatake olo raike ie mba hamaky aze. Laha fa nijànjy soa Josia, le nihaine fa tsy nanorike ty lalàn’i Jehovah napetrane tamy boky io tao sasy ty vahoake. Nampalahelo an’i Josia maré raha zay, ka nodriàtine akanjone iny. Hitanao ie amy sary io. Hoy ty asane: ‘Meloke amintsika Jehovah satria tsy nanorike ty lalàne voasoratse anaty boky toy ato ty razantsika.’

Nanirake an’i Hilkia Josia mba hanontany ty raha hataon’i Jehovah amin’Israelita reo. Nandeha tamin’i Holda, mpaminanivavy zay tany Hilkia mba hanontany aze, mikasike raha tean’i Josia ho hay io. Nambaran’i Holda tamin’i Hilkia, hafatse baka amin’i Jehovah toy hoe: ‘Hosazì-Ndranahare Jerosalema noho ty olo iaby mipetrake eto, satria nivavake tami-ndranahare diso ty olo, ka feno raha raty ty tany. Fe noho Josia nana toetsy soa, le mbo tsy ho avy tseky loza io, laha tsy fa maty ie. Ambarao amin’i Josia raha zay.’

2 Tantara 34:1-28.