Makani 73: Mwami Uuli Kabotu Wamamanino wa Isilayeli
JOSIYA ujisi buyo myaka iili lusele naaba mwami wamisyobo yobilo ya Isilayeli yakumusanza. Ucili mwana kuba mwami. Aboobo kumatalikilo bapati balamugwasya kulela cisi.
Josiya naakaba mwami kwamyaka iili ciloba, wakatalika kuyandaula Jehova. Wakaccilila cikozyanyo cabami bali kabotu mbuli Davida, Josafati a Hezekiya. Aboobo kacili buyo mukubusi, Josiya wacita cintu cilamya.
Kwaciindi cilamfwu, bunji bwabana Isilayeli bakali babi. Bakomba baleza bakubeja. Bafwugamina zibumbwa. Aboobo Josiya waunka abantu bakwe kwaakugusya bukombi bwakubeja mucisi. Ooyu mulimo mupati nkaambo bantu banji bakomba baleza bakubeja. Ulakonzya kumubona Josiya aawa abantu bakwe nkobapwaya zibumbwa.
Kumane Josiya wabikka basankwa botatwe kutegwa kabeendelezya mukubambulula tempele lya Jehova. Mali alabwezelelwa kubantu akupa bantu aaba kutegwa babelesye mumulimo uuyandika kubeleka. Kababeleka atempele, imupaizi mupati Hilikiya wakajana cintu ciyandika kapati. Eeli ndibbuku lyamulawo Jehova ndyaakapa Musa kaindi kuti alembe. Lyakaliziminide kwamyaka minji.
Ibbuku lyatolwa kuli Josiya, eelyo walomba kuti abalilwe. Kaswiilila, Josiya wabona kuti bantu taku nibakali kuccilila mulawo wa Jehova. Wausa kapati kumakani aaya, aboobo wayaula zisani zyakwe mbuli mbobona aawa! Wati: ‘Jehova watukalalila nkaambo bamatata tiibakaiccilila milawo iilembedwe mubbuku eeli.’
Josiya walailila mupaizi mupati Hilikiya kuti abone cintu Jehova ncayanda kubacitila. Hilikiya waunka kumusinsimi mukaintu wazina lya Hulida, eelyo wamubuzya. Hulida wamwaambila mulumbe ooyu uuzwa kuli Jehova kuti atole kuli Josiya. Wati: ‘Jelusalemu abantu bakwe boonse baya kusubulwa akaambo kakukomba baleza bakubeja, alimwi nyika yoonse yavwula bubi. Pele akaambo kakuti iwe Josiya wacita cili kabotu, tokasubulwi pe, uuya kwiile kufwa lufwuŋanda.’
2 Makani 34:1-28.
Mibuzyo
- Ino ujisi myaka yongaye Josiya naaba mwami, alimwi ncinzi ncaakatalika kucita naakakkwanisya myaka iili ciloba yakulela?
- Ncinzi ncobona acifwanikiso Josiya ncacita?
- Ncinzi mupaizi mupati ncaakajana bantu nibakali kuyakulula tempele?
- Nkaambo nzi Josiya ncayaula zisani zyakwe?
- Mulumbe nzi uuzwa kuli Jehova musinsimi Hulida ngwaamwaambila Josiya?
Mibuzyo aimwi
- Bala 2 Makani 34:1-28.
Ncikozyanyo nzi Josiya ncapa kuli baabo banga bakaliyumya kubwana? (2 Mak. 33:21-25; 34:1, 2; Int. 27:10)
Nintaamu nzi iiyandika Josiya njaakabweza ikutola ampela bukombi bwakasimpe mumwaanda wamwaka wa 8, 12 a 18 mumazuba aakwe aakulela? (2 Mak. 34:3, 8)
Nziiyo nzi nzyotukonzya kwiiya kuzikozyanyo zyakacitwa a Mwami Josiya alimwi a Hilikiya Mupaizi Mupati caboola kumakani aakulanganya masena eesu aakukombela? (2 Mak. 34:9-13; Tus. 11:14; 1 Kor. 10:31)
