ИО́СИЯ Изра́ильдиң мурнуу ийи төрел аймааның хааны апарганда, ол чүгле сес харлыг. Ол хаан болур дээрге, хөлүн эртир аныяк-тыр. Ынчангаш эгезинде чонну удуртурунга аңаа каш улуг кижи дузалажып турар.

Ио́сия чеди чыл хааннааш, Иегованы дилеп эгелээн. Ол Дави́д, Иосафа́т болгаш Езеки́я деп хааннарның эки үлегерин өттүнүп турар. Ио́сия элээди тургаш-ла, бир дидим чорук кылган.

Үр үе дургузунда изра́ильчилерниң хөй кезии дыка багай чоруктар кылып турар. Олар меге бурганнарга чүдүп турар. Дүрзү-бурганнарның мурнунга дискектенип турар. Ынчангаш Ио́сия чалчалары-биле үнгеш, чуртун меге чүдүлгеден арыглап эгелээн. Дыка хөй күжениишкиннер херек, чүге дээрге меге бурганнарга дыка хөй кижилер чүдүп турар. Бо арында Ио́сия чалчалары-биле кады дүрзү-бурганнарны канчаар бузуп турарын көрүп тур сен.

Ооң соонда Ио́сия үш эр кижини Иегованың өргээзиниң септелгезин хайгаараар кылдыр тургузуп каан. Чондан акшаны чыггаш, ол эр кижилерге херектиг ажылдарже берип турар. Ол ажылдар үезинде дээди бараалгакчы Хелкия Бурганның өргээзинден бир чугула чүве тып алган. Хоойлу номун — хөй чыл бурунгаар Иегованың Моисе́йге бижизин дээн демги ному. Ол үр үе иштинде читкен деп санаттынып турган.

Номну Ио́сияга эккээрге, ону ыыткыр номчуп бээрин ол дилээн. Ону дыңнааш, чон Иегованың хоойлузун күүсетпейн турар деп, Ио́сия билип каапкан. Чурукта көрүп турарың ышкаш, ол дээш хөлчок муңгараан: ол бодунда хевин ора тыртып турар. ‘Иегова бисче килеңеп турар, чүге дээрге бистиң адаларывыс бо номда бижиттинген хоойлуларны сагывайн турган’,— деп, ол муңгарап чугаалаан.

База Хелкия деп дээди бараалгакчыны Иегова оларның-биле чүнү кылыр деп турарын билип алыр кылдыр, ол дужааган. Хелкия Олда́на дээр херээжен медээчиже чорупкан. Ол Иеговадан дараазында харыы-биле эглип келген: ‘Иерусали́м болгаш бүгү чон меге бурганнарга чүдүп турары дээш, база бүгү чер каржы херектер-биле дола бергени дээш, кеземче алыр. Ынчалза-даа сен, Ио́сия, шын херектер кылып турарың дээш, ол кеземче сээң чуртталгаң үезинде келбес’.