Esapulo 73: Osoma Yiwa ya Sulako ya va Isareli
YOSIYA eci a fetika oku viala apata avali a va Isareli, wa kala leci ci soka anyamo ecelãla. Eye wa kala calua umalẽhe. Kuenje akulu vamue vo kuatisako oku viala ofeka.
Eci papita anyamo epanduvali tunde eci a vialekiwa, Yosiya wa fetika oku sandiliya Yehova. Eye wa kuama ongangu yiwa ya soma Daviti, la Yehosafata kuenda Hesekiya. Osimbu handi a kala umalẽhe Yosiya wa lingile ale ocina cimue ci komõhisa.
Vokuenda kuanyamo alua va Isareli va kala loku linga lika ovina vĩvi. Ovo va enda loku fendela olosuku viesanda kuenda oviñumañuma. Omo liaco, Yosiya wa tunda lalume vaye kuenje wa tundisa efendelo liesanda vofeka. Upange waco ka wa lelukile momo kua kala omanu valua va enda loku fendela olosuku viesanda. Kũlĩhisa ndomo Yosiya lomanu vaye va kasi loku nyõla oviñumañuma.
Noke Yosiya wa tumbika alume vatatu oco va kale olomitavaso viupange woku semulula onembele ya Yehova. Va kongola olombongo vialua komanu kuenje via eciwa kalume vaco. Olombongo viaco via fetiwa kupange wonembele. Osimbu va kala loku talavaya, Hilikiya ocitunda cinene wa nõla ocina cimue cisilivila. Ocina caco, elivulu liovihandeleko vina Yehova a ecele ku Mose oco a vi sonehe. Tunde apa elivulu liaco lia nyelela, papitile ale anyamo alua.
Elivulu liaco lia tualiwa ku Yosiya, kuenje wa tuma oku u tangelako elivulu liaco. Osimbu Yosiya a kala loku yevelela, wa limbuka okuti omanu ka va kaile loku pokola kovihandeleko via Yehova. Yosiya wa sumuile calua kuenje wa tola uwalo waye ndomo o cilete palo. Eye wa popia hati: ‘Yehova wa tema letu. Momo olosekulu vietu ka via pokuile kovihandeleko via sonehiwa velivulu lilo.’
Yosiya wa tuma ocitunda cinene Hilikiya oco a kũlĩhise eci Yehova a laika oku va lingila. Oco Hilikiya wa enda ku Hulida ukãi umue uprofeto oku ka vangula ondaka yaco. Hulida wa eca kokuaye olondaka via tunda ku Yehova oku vi sapuila Yosiya. Eye wa popia hati: ‘Yerusalãi lolonungi viaye, yi yambuiwa omo lioku fendela kuavo olosuku viesanda. Ofeka yeyuka evĩho lialua. Puãi ove a Yosiya, omo okuti wa linga ovina viwa, eyambulo liaco ka liya vofeka toke eci o fa.’
2 Asapulo 34:1-28.
Apulilo
- Eci Yosiya a linga osoma wa kuata anyamo añami? Kuenda nye a lingile eci pa pita anyamo epanduvali?
- Nye Yosiya a kasi oku linga ndomo ca lekisiwa vociluvialuvia catete?
- Nye ocitunda cinene ca sanga eci alume va kala loku semũlula onembele?
- Momo lie Yosiya a towilile uwalo waye?
- Uvangi upi wa tundilila ku Yehova Hulida uprofeto a sapuila Yosiya?
Apulilo akuavo
- Tanga 2 Asapulo 34:1-28.
Ongangu yipi Yosiya a sia ku vana va siata oku liyaka lovitangi vutila? (2 Asa. 33:21-25; 34:1, 2; Osa. 27:10)
Nye Yosiya a lingile kuviali waye okuti ca vetiya efendelo liocili kunyamo wecelãla, kunyamo wekũi lavali kuenda kunyamo wekũi lecelãla? (2 Asa. 34:3, 8)
Ongangu yipi yiwa yatiamẽla kefendelo Soma Yosiya kuenda Ocitunda Cinene Hilikiya va tu sila? (2 Asa. 34:9-13; Olosap. 11:14; 1 Va Kor. 10:31)
