Yosia o vha e na miṅwaha ya malo fhedzi musi a tshi vha khosi ya tshaka mbili dza Isiraele. O vha a tshee muṱukusa u vha khosi. Ngauralo u thomani vhahulwane vha mu thusa u vhusa.

Musi Yosia o vha khosi miṅwaha ya sumbe a thoma u ṱoḓa Yehova. A tevhela tsumbedzo ya dzikhosi dzavhuḓi sa Davida, Yosafati na Hiskia. Zwino, musi Yosia a kha ḓi vha muswa, a ita tshithu tsha u sumbedza u sa ofha.

Nga tshifhinga tshilapfu Vhaisiraele vhanzhi vho vha vhe vhavhi. Vho vha vha tshi rabela midzimu i sili, vha tshi gwadamela zwifanyiso. Ngauralo Yosia a bva na vhanna vhawe a thoma u bvisa vhurabeli ha mazwifhi. Uyu wo vha u mushumo muhulu ngauri vhanzhi vho vha vha tshi rabela midzimu i sili. Ni nga mu vhona afha na vhanna vhawe vha tshi khou pwasha zwifanyiso.

Nga murahu, Yosia a vhea vhanna vhararu uri vha vhe vhahulwane vha u lugisa thembele. Tshelede ya kuvhanganywa vhathuni ya fhiwa avha vhanna u holela mushumo we wa vha u tshi ḓo itwa. Musi vha tshi khou shuma thembeleni, tshifhe muhulu Hilikia a wana henefho iḽa bugu ya mulayo ye Yehova a ri Mushe a i ṅwale kalekale. Yo vha yo xela miṅwaha minzhi.

Bugu ya iswa ha Yosia, nahone a humbela uri a vhalelwe yone. Musi o thetshelesa, Yosia a vhona uri vhathu vho vha vha songo vhulunga mulayo wa Yehova. Zwa mu ṱungufhadza, ngauralo a kherukanya zwiambaro zwawe, samusi ni tshi nga zwi vhona afha. A ri: ‘Yehova o ri sinyutshela, ngauri vhokhotsi ashu a vho ngo vhulunga milayo yo ṅwalwaho buguni iyi.

Yosia a laya tshifhe muhulu Hilikia uri a wane uri Yehova o vha a tshi ḓo vha itani. Hilikia a ya ha musadzi Huluda, we a vha e muporofita, a mu vhudzisa. Huluda a mu fha iyi ndaela i bvaho ha Yehova uri a i ise ha Yosia: ‘Yerusalema na vhathu vhoṱhe vha ḓo ṱarafiwa nge vha rabela midzimu i sili nahone shango ḽo ḓala vhuvhi. Fhedzi ngauri iwe, Yosia, wo ita zwivhuya, tshiṱarafu itshi a tshi nga ḓi u swikela nga murahu ha lufu lwau.’

2 Koronika 34:1-28.