OTSO anyos pa la hi Josia han magin hadi hiya ha duha nga tribo han Israel ha sur. Batan-on pa gud hiya para magin hadi. Salit ha tinikangan, ginbuligan hiya han pipira nga katigurangan ha pagmando ha nasud.

Han pito ka tuig na nga nagmamando hi Josia, nagtikang hiya ha pamiling kan Jehova. Ginsubad niya an susbaranan han mag-opay nga hadi pariho kanda David, Jehosapat ngan Hesekia. Katapos, han tinedyer pa la hiya, may-ada hiya ginbuhat nga nagkinahanglan hin kaisog.

Maiha gud nga panahon nga nagbuhat hin karaotan an damu nga mga Israelita. Nagsisingba hira ha palso nga mga dios. Nayukbo hira ha mga idolo. Salit naglibot hi Josia kaupod an iya mga tawohan basi bungkagon an palso nga pagsingba ha nasud. Daku ini nga trabaho tungod kay damu nga katawohan an nagsisingba ha palso nga mga dios. Makikita mo dinhi ha retrato nga ginbubungkag ni Josia ngan han iya mga tawohan an mga idolo.

Katapos, ginsugo ni Josia an tulo nga kalalakin-an nga manguna ha pag-ayad han templo ni Jehova. Nangolekta hira hin kwarta ha katawohan basi gamiton ha pagpatrabaho. Samtang nag-aayad hira ha templo, may-ada importante gud nga hin-agian didto an hitaas nga saserdote nga hi Hilkia. Ito mismo an libro han balaud nga maiha na gud nga iginpasurat ni Jehova kan Moises. Nawara ito ha sulod hin damu na ka tuig.

Gindara an libro kan Josia, ngan naghangyo hiya nga basahon ito ha iya. Samtang namamati hiya, nasantop niya nga diri ginsusunod han katawohan an mga balaud ni Jehova. Nasubo gud hiya tungod hini, salit gin-gisi niya an iya panapton, sugad han makikita mo dinhi. Nagsiring hiya: ‘Nasisina hi Jehova ha aton tungod kay waray sunda han aton kaapoy-apoyan an mga balaud nga nahisurat hini nga libro.’

Ginsugo ni Josia an hitaas nga saserdote nga hi Hilkia nga usisahon kon ano an pagbubuhaton ni Jehova ha ira. Kinadto hi Hilkia kan propetisa Hulda, ngan ginpakianhan hiya. Iginpasumat ni Hulda kan Hilkia ini nga mensahe tikang kan Jehova para kan Josia: ‘Sisirotan an Jerusalem ngan an ngatanan nga katawohan tungod kay nagsingba hira ha palso nga mga dios ngan napuno hin karaotan an tuna. Kondi tungod kay ikaw, Josia, nagbubuhat han maopay, ini nga sirot diri mahitatabo samtang buhi ka pa.’