Tantara 73

Ampanjaka Nan̈ano Ny Tsara Farany

JOSIA nanjary ampanjakan’ny foko aroen’Israely atsimo. Valo taon̈o izy tamy zen̈y. Izy farany hely tamin’ampanjaka jiaby. Tamy voanalohany, nisy olo maromaro nitatahy izy hitaondra.

Koa fa fito taon̈o nampampanjaka Josia, izy nanampôno nitady Jehovah. Izy nan̈araka raha tsara nataon’i Davida, Josafata ndreky Hezekia. Ke Josia koa fa tôvolahy, nasaky nan̈ano raha araiky zay.

Ankamaraozan’Israelita aby io mbala nan̈ano raha ratsy fo. Irô nivavaka tamy zan̈ahary tsy izy. Irô nankôhoko tamy sampy. Ke Josia namory lelahy maro hiaraka aminany, han̈adoso fivavahan̈a diso tan’Israely. Tsy mora man̈ano zen̈y, fôtony maro olo nivavaka tamy zan̈ahary tsy izy. Hitanao amy sary io Josia ndreky olonany manôrotôro sampy aby io. 

Koa fa vita zen̈y, Josia nan̈iraka lelahy telo hikarakara fan̈amboaran̈a tempolin’i Jehovah. Maro vola namian’olo tamy zen̈y navory, baka iô namian̈a lelahy aby io, han̈anaovan̈a asa io. Tandraraiky, irô tamy zen̈y niasa tempoly, nisy mpisôron̈o araiky, Hilkia an̈arany, nahita raha ten̈a nisy valerany. Izio boky misy lalàn̈an’i Jehovah, nisoratan’i Mosesy efa ela. Efa taon̈o taon̈o raha io tsy hita.

Boky in̈y koa fa nindesin̈y tamy Josia, nirahiny nivakin̈y taminany. Koa fa nandeha vakiteny, Josia nahay fa kaiky olo aby io tsy nan̈araka volan̈a Jehovah. Izy nalemy trôko. Hitanao amy sary io izy man̈atriaka lambanany. Volan̈iny: ‘Jehovah meloko amitsika, fôtony olobetsika tsy nan̈araka lalàn̈a voasoratra amy boky ty.’

Josia baka tiô nan̈iraka Hilkia mpisôron̈obe, han̈ontany raha handeha ataon’i Jehovah irô. Hilkia nandeha tamy Holda mpaminan̈ivavy tan̈y. Holda nivolan̈a taminany hafatra jiaby boaka tamy Jehovah andeha amy Josia. Volan̈iny: ‘Hisazin̈y Jerosalema ndreky olo jiaby ao, fôtony nivavaka tamy zan̈ahary tsy izy, ndreky nan̈ano raha farany ratsy. Kanefa tsy amin’andranao zaho man̈ano zen̈y, fôtony anao nan̈ano ny tsara.’

2 Tantara 34:1-28.