MOO hyɛ ni ɔmɛ nɛ a ngɛ niheyo ɔ he fɛu yee. O le niheyo ɔ lo? E biɛ ji Yeremia. Nɛ e ji Mawu gbalɔ ngua.

Benɛ Yosia bɔni amaga amɛ puɛmi ngɛ ma a mi ɔ, e kɛ we tsɔ nɛ Yehowa de Yeremia kaa e pee E gbalɔ. Se, Yeremia susu kaa e wɛ bɔnɛ e ma nyɛ maa pee gbalɔ. Se Yehowa de lɛ kaa e maa ye bua lɛ.

Yeremia de Israelbi ɔmɛ kaa a jɔɔ ní yayamihi peemi. E de mɛ ke: ‘Jema amɛ a mawu ɔmɛ nɛ a ngɛ jae ɔ ji lakpa mawuhi.’ Se Israelbi ɔmɛ fuu suɔ kaa á ja amaga amɛ mohu pe Yehowa, anɔkuale Mawu ɔ. Nɛ benɛ Yeremia de mɛ kaa Mawu maa gbla a tue ngɛ a ní yayami ɔmɛ a he ɔ, muɔmi kɛkɛ nɛ a muɔ lɛ.

Jehahi ba be. Yosia gbo, nɛ nyɔhiɔ etɛ se ɔ, a to e bi Yehoyakim matsɛ. Yeremia de ni ɔmɛ si abɔ ke: ‘A ma kpata Yerusalem hɛ mi ke nyɛ tsakee we nyɛ ní peepee yayami ɔmɛ.’ Osɔfo ɔmɛ nu Yeremia nɛ a kpa ngmlaa wo e yi ke: ‘O sa gbenɔ ngɛ munyuhi nɛ o ngɛ tue nɛ ɔmɛ a heje.’ Lɔɔ se ɔ, a de Israel ma nimeli ɔmɛ ke: ‘Nyɛɛ gbe Yeremia, ejakaa e tu munyu yayami kɛ si wa ma a.’

Amlɔ nɛ ɔ, kɛ Yeremia maa pee kɛɛ? E yi gbeye! E de mɛ tsuo ke: ‘Yehowa ji nɔ nɛ tsɔ mi kaa ma ba de nyɛ ní nɛ ɔmɛ. Ke nyɛ tsakee we nyɛ ní peepee yayami ɔmɛ ɔ, Yehowa ma kpata Yerusalem hɛ mi. Se nyɛ ná nɛ nyɛɛ le kaa, ke nyɛ gbe mi ɔ, nyɛ gbe nɔmlɔ nɛ pee we yayami ko.’

Nimeli ɔmɛ gbi Yeremia, se Israelbi ɔmɛ hu tsakee we ngɛ a ní yayami ɔmɛ a peemi he. Pee se ɔ, Babilon matsɛ Nebukadnezar kɛ Yerusalem ba hwu ta. Nyagbe mi ɔ, Nebukadnezar ngɔ Israelbi ɔmɛ nyɔguɛhi. E ngɔ nihi akpehi abɔ kɛ ho Babilon ya. Mo susu bɔnɛ e ma ji ha kaa nibwɔhi ma ba nu mo kɛ je mo nitsɛ o ma mi kɛ ho ma se ya!