MONA umulumendo uyu uo baleseka. Bushe naumwishiba? Ni Yeremia. Yeremia ali ni kasesema wa kwa Lesa uwacindama sana.

Ilyo Imfumu Yoshia yatendeke fye ukonaula tulesa twa bufi mu calo, Yehova aebele Yeremia ukuba kasesema Wakwe. Yeremia alemona kwati te kuti abe kasesema pantu ali umwaice. Lelo Yehova amwebele ati, Akulamwafwa.

Yeremia aebele abena Israele ukuleka ukucita ifyabipa. Abebele ati: ‘Tulesa uto abantu bapepa twa bufi.’ Nomba abena Israele abengi tabalepepa Yehova Lesa wa cine, batemenwe ukupepa tulesa twa bufi. Abantu basekele Yeremia ilyo abebele ukuti Lesa akabonaula pa mulandu wa kuti balecita ifyabipa.

Mu kuya kwa nshita, Yoshia alifwile. Pa numa ya myeshi itatu, umwana wakwe Yehoyakimu e watendeke ukuteka. Yeremia atwalilile fye ukweba abantu ati: ‘Yerusalemu ikonaulwa nga tamulekele ukucita ifyabipa.’ Bashimapepo baikete Yeremia no kupunda ati: ‘Ufwile ukufwa pa fyo watweba.’ Lyena baebele abakalamba ba mu Israele abati: ‘Yeremia afwile ukufwa, pantu alanda ati umusumba wesu ukonaulwa.’

Cinshi Yeremia acitile? Tatiinine! Aebele abantu bonse ati: ‘Yehova e untumine ukumweba ati nga tamulekele ukucita ifyabipa, Yerusalemu ikonaulwa. Mwilaba ukuti: Nga mwanjipaya, ninshi mwaipaya umuntu uushicitile icibi.’

Nangu ca kuti Yeremia tabamwipeye ku bakalamba ba mu Israele, abena Israele tabalekele ukucita ifyabipa. Pa numa, Nebukadnesari, imfumu ya ku Babiloni yaile mu kulwa na baleikala mu musumba wa Yerusalemu. Na mu kulekelesha, Nebukadnesari alengele abena Israele baba abasha bakwe. Asendele abantu abengi ku Babiloni. Bushe kuti waumfwa shani abantu abo tawaishiba nga bakusenda no kukutwala ku calo cimbi!