Stori 74: Wan Man We i No Fraet
LONG pija ya, ol man oli stap jikim yangfala ya. ?Yangfala ya hem i hu? Hemia Jeremaea. Hem i wan bigfala profet blong God.
Smoltaem afta we King Josaea i stat spolem ol aedol long kantri ya; Jeova i singaot Jeremaea blong i kam profet blong Hem. Jeremaea i ting se hem i yangfala tumas blong mekem wok ya. Be Jeova i talem se Hem bambae i givhan long hem.
Jeremaea i talem long ol man Isrel blong oli stop blong mekem ol fasin nogud. Hem i se: ‘Ol god blong ol narafala nesen oli giaman god nomo.’ Be plante man Isrel oli laekem blong wosip long ol aedol i winim we oli wosip long trufala God ya Jeova. Taem Jeremaea i talem long ol man se God bambae i panisim olgeta from ol nogud fasin blong olgeta, ol man ya oli laf long hem.
Plante yia i pas, nao Josaea i ded. Tri manis biaen, pikinini blong hem, Jehoeakim, i kam king. Jeremaea i gohed blong talem long ol man se: ‘Sipos yufala i no lego ol nogud fasin blong yufala, bambae Jeova i spolem taon ya Jerusalem.’ Nao ol pris oli girap oli holem Jeremaea mo oli singaot bigwan se: ‘!Yu mas ded from tok ya!’ Biaen oli go luk ol lida blong Isrel mo oli talem long olgeta se: ‘Man ya Jeremaea, hem i mas ded ya, from we hem i stap tok nogud long bigfala taon ya blong yumi.’
?Jeremaea i mekem wanem? !Hem i no fraet! Hem i talem long olgeta se: ‘Jeova nomo i sanem mi, blong mi talemaot olgeta samting ya we yufala i harem. Yufala i mas lego ol fasin nogud we yufala i stap mekem. Sipos no, bambae hem i spolem Jerusalem. Mo sipos yufala i kilim mi mi ded, yufala i mekem i no stret, from we mi mi wan stret man nomo.’
Ol lida blong Isrel oli no kilim Jeremaea i ded. Mo ol man Isrel oli no jenisim ol nogud fasin blong olgeta tu. Biaen, Nebukadnesa we hem i king blong Babilon, i kam wetem ol soldia blong hem blong faet agens long Jerusalem. Nebukadnesa i mekem ol man Isrel oli kam slef blong hem, mo i tekem plante taosen blong olgeta oli gobak long Babilon. !Traem tingbaot filing blong yu sipos ol man blong narafala kantri oli kam karem yu yu gobak long ples blong olgeta we yu no save nating long hem!
Jeremaea 1:1-8; 10:1-5; 26:1-16; 2 King 24:1-17.
Ol Kwestin
- ?Hu ya yangfala man long pija ya?
- ?Taem Jeova i singaot Jeremaea blong i kam wan profet, wanem tingting blong Jeremaea? ?Be Jeova i talem wanem long hem?
- ?Wanem tok we Jeremaea i stap talemaot long ol man?
- ?Ol pris oli mekem wanem blong traem blokem Jeremaea? ?Olsem wanem Jeremaea i soem se hem i no fraet?
- ?Wanem i hapen taem ol man Isrel oli no lego ol rabis fasin blong olgeta?
Sam narafala kwestin
- Ridim Jeremaea 1:1-8.
?Olsem stori blong Jeremaea i soem, wanem nao i mekem se yumi naf blong mekem ol wok blong Jeova? (2 Kor. 3:5, 6)
?Olsem wanem eksampol blong Jeremaea i save leftemap tingting blong ol yangfala Kristin tede? (Pri. 12:1; 1 Tim. 4:12)
- Ridim Jeremaea 10:1-5.
?Jeremaea i yusum wanem strong pijatok blong soem se i krangke nomo blong trastem ol aedol? (Jer. 10:5; Aes. 46:7; Hab. 2:19)
- Ridim Jeremaea 26:1-16.
?Taem ol man we tabu spirit i makemaot olgeta oli talemaot woning tede, olsem wanem oli folem oda we Jeova i givim long Jeremaea blong ‘no mestem wan samting’? (Jer. 26:2; Dut. 4:2; Wok 20:27)
?Wanem gudfala eksampol we Jeremaea i givim long ol Witnes blong Jeova tede taem oli talemaot woning long olgeta nesen? (Jer. 26: 8, 12, 14, 15; 2 Tim. 4:1-5)
- Ridim 2 King 24:1-17.
?Wanem nogud samting i hapen long ol man Juda from we oli no stap tru long Jeova? (2 King 24:2-4 14)
