Omurumendu ngu hi nemuma
EHUNGI 74
Omurumendu ngu hi nemuma
TARA ovandu mbu mave yoro omurumendu omutanda ngwi. Ove mo tjiwa kutja eye owaṋi? Eye oJeremia. Eye wa ri omuprofete waMukuru omunanḓengu tjinene.
Tjimanga kombunda yaindu ombara Josija tja nyona ovisenginina mehi, Jehova wa raera Jeremia kutja nga rire omuprofete we. Nungwari Jeremia ee ripura kutja eye omuṱiṱi tjinene okurira omuprofete. Nungwari Jehova wa tja me mu vatere.
Jeremia wa raera kOvaisrael kutja ngave ise okutjita oviṋa ovivi. Eye wa tja: ‘Oomukuru mba ovandu voviwaṋa ku ve rikotamene ovoposyo.’ Nungwari Ovaisrael ovengi aave zeri okurikotamena kovisenginina moruveze rwokurikotamena ku Mukuru uatjiri, Jehova. Indu Jeremia tja raera kovandu kutja Mukuru me ve vere mena rouvi wawo, owo aave mu yoro.
Ozombura za kapita. Josija wa ṱa, nu kombunda yomieze vitatu omuzandu we Jojakim ongwa rira ombara. Jeremia ngunda wa kayenda komurungu okuraera otjiwaṋa: ‘Jerusalem matji yandekwa indu eṋe tji mu hi nakurundurura ozongaro zeṋu ozombi.’ Ovapristeri va kambura Jeremia nave tja: ‘Ove wa sokuṱa mena roviṋa mbi wa hungire.’ Okuzambo ave raere ovanane vaIsrael ave tja: ‘Jeremia ma sokuṱa mena rokutja eye wa hungire ombirukira notjihuro tjetu.’
Jeremia okuzambo wa tjita tjike? Eye kaa tira! Eye wa tja ku wo avehe: ‘Jehova we ndji hinda okumuraera oviṋa avihe mbi. Indu tji mu hi nakurundurura ozongaro zenu zehupo, Jehova ma yandeke Jerusalem. Nungwari tjiweye ihi: Indu eṋe tji mwe ndji zepa, eṋe mamu zepa omundu ngu hi nondjo.’
Ovanane vaIsrael kave zepere Jeremia, nungwari Ovaisrael kave rundururire ozongaro zawo ozombi. Kombunda Nebukadnesar, ombara yaBabilon, ye ya okurwisa Jerusalem. Korusenina Nebukadnesar wa isa po Ovaisrael ovakarere ve. Eye twara omayovi omengi ku Babilon. Ove ripurira kokutja mape kara vi indu ovandu mbu hi nokutjiwa tji ve kutoora poyoye nave kutwara kehi ndu hi nakutjiwa.
