TAQSIṬ TIS 74

Argaz ur nesɛi tugdi

MUQEL imdanen-​agi iţmesxiṛen ɣef wergaz-​a. Teẓriḍ anwa-​t? Isem-​is Irmiya. D nnbi ameqran n Ṛebbi.

Asmi i gebda itekkes Yucyahu lmeṣnuɛat si tmurt, Yahwa yumeṛ i Irmiya ad yili d nnbi-​ines. Lameɛna Irmiya yenwa ur yezmir ara ad yili d nnbi axaṭer mazal-​it meẓẓi. Dɣa Yahwa iḍmen-​it belli a t-​iɛiwen.

Irmiya yumeṛ i wegdud ad yeḥbes lexdayem-​is n diri. Yenna: ‘Ur ţɛebbidet ara iṛebbiten n lekdeb i ţɛebbiden leǧnas.’ Lameɛna aṭas si wat Isṛayil i gesmenyifen ad ɛebden lmeṣnuɛat wala Yahwa, Ṛebbi n tideţ. Mi sen-​iɛeggen Irmiya belli a ten-​iɛaqeb Ṛebbi ɣef ddemma n cceṛ i xeddmen, nutni ţţaḍṣan fell-​as.

Ɛeddan kra n iseggasen, dɣa yemmut Yucyahu. Tlata wagguren umbeɛd, mmi-​s Yahuyaqim yuɣal d agellid. Irmiya yeţkemmil yeqqar i wegdud: ‘Aţ-​ţeɣli Yarucalim m’ur tbeddlem ara tikli-​nwen.’ Imiren-​nni kan lmuqeddmin mmɣen fell-​as yerna ţɛeggiḍen: ‘Tuklaleḍ lmut ɣef wayen i d-​teqqareḍ.’ Mbeɛd nnan i imeqranen n Isṛayil: ‘Irmiya istahel lmut axaṭer iwet di temdint-​nneɣ.’

Acu ara yexdem tura Irmiya? Ur yugad ara! Yendeh zdat n lɣaci meṛṛa: ‘Iceggeɛ-​iyi-​d Yahwa akken a wen-​d-​iniɣ leḥwayeǧ-​agi. M’ur tbeddlem ara tikli i d-​tewwim, Yahwa ad ihudd Yarucalim. Lameɛna amnet s wannect-​a: Ma tenɣam-​iyi, aţ-​ţessizzlem idammen n win ur nexdim acemma.’

Imeqranen n wegdud serrḥen i Irmiya, lameɛna At Isṛayil ur beddlen ara yir tikli i d-​wwin. Ɣer zdat, Nabuxadnuẓur, agellid n Babil, yusa-​d ad yeẓdem ɣef Yarucalim. Ɣer taggara, Nabuxadnuẓur yerra At Isṛayil d iqeddacen-​is. Yewwi luluf seg-​sen ɣer temdint n Babil. Xayel ciṭuḥ! Acu ara tḥusseḍ ma yella usan-​d medden ur tessineḍ ara a k-​awin seg wexxam-​ik ɣer tmurt tabeṛṛanit?

Irmiya 1:1-8; 10:1-5; 26:1-16; 2 Igelliden 24:1-17.