ANI li winq yookebʼ xseʼenkil? Aʼan laj Jeremias ut aj kʼanjel chiru li Jehobʼa. Laj Jeremias yook xkʼeebʼal jun nimla esil rehebʼ laj Israel.

Laj Josias ak kixsach chixjunil ebʼ li pechʼbʼil yos saʼ li tenamit Jerusalen, naq li Jehobʼa kixye re laj Jeremias naq tkanaaq choʼq aj kʼanjel chiru. Laj Jeremias kixkʼoxla naq inkʼaʼ truuq kʼanjelak chiru li Jehobʼa xbʼaan naq toj saaj. Abʼan li Jehobʼa kixyeechiʼi xtenqʼankil.

Laj Jeremias kixye rehebʼ laj Israel naq teʼxkanabʼ xbʼaanunkil li maaʼusilal. Tojaʼ naq kixye rehebʼ: ‹Ebʼ li tenamit yookebʼ xloqʼoninkil ebʼ li pechʼbʼil yos›. Naabʼalebʼ laj Israel inkʼaʼ chik nekeʼraj xloqʼoninkil li Jehobʼa. Laj Jeremias kixye re li tenamit naq li Jehobʼa traqoq aatin saʼ xbʼeenebʼ. Naq keʼrabʼi aʼin, keʼok xseʼenkil.

Chirix chik aʼan kikamk laj Josias. Oxibʼ po xkamik laj Josias naq laj Joaquim, li ralal, kikanaak choʼq awabʼej. Laj Jeremias kixye rehebʼ laj Israel: ‹Li tenamit Jerusalen tsachmanq wi inkʼaʼ nekeejal leenaʼlebʼ›. Joʼkan naq ebʼ laj tij keʼxchap laj Jeremias ut keʼxye: ‹Tento naq tkamq laj Jeremias xbʼaan naq xmaajewa li qatenamit!›

Kʼaru tixbʼaanu laj Jeremias xbʼaan naq teʼraj xkamsinkil? Laj Jeremias inkʼaʼ naxuwak chiru li tenamit, joʼkan naq kixye rehebʼ: ‹Li Jehobʼa kitaqlank chaq we eerikʼin ut wi inkʼaʼ nekeejal leenaʼlebʼ, traqoq aatin saʼ xbʼeen leetenamit Jerusalen. Wi tineekamsi, laaʼex nekeenaw naq maakʼaʼ inmaak cheeru›.

Ebʼ li nekeʼjolomink saʼ li tenamit inkʼaʼ keʼxkamsi laj Jeremias, abʼan ebʼ laj Israel inkʼaʼ keʼxkanabʼ xbʼaanunkil li maaʼusilal. Chirix chik aʼan; laj Nabucodonosor, li awabʼej re Babilonia, kichalk chi yalok saʼ xbʼeenebʼ laj Jerusalen. Tojaʼ naq laj Nabucodonosor kixkʼehebʼ laj Israel choʼq xmoos. Naabʼalebʼ xkʼihal laj Israel kixkʼam saʼ li tenamit Babilonia. Kʼaru taakʼoxla naq jun chʼuut chi winq tateʼxkʼam raj saʼ jalan chik tenamit?